Estende Estadu Emerjénsia Dala-12, Fó Impaktu Ba Povu Ki’ik Sira
“Hakerek nain husi Joazito Mariano Pinto”
“Ha’u nia bomdia, boa tarde & boa noite ba maluk Timor oan sira hotu. Ha’u hanesan joven ida iha joven rihun ida nia leet, ha’u hanesan sidadaun ida, iha sidadaun rihun ida nia leet, ha’u hanesan estudante ida iha estudantes rihun ida nia leet, ha’u hanesan universitáriu ida iha universitários rihun ida nia leet, ha’u hanesan vendedor ambulante ida iha vendedores ambulantes rihun ida nia leet, ha’u hanesan motorista ida iha motoristas rihun ida nia leet, ha’u hanesan ajudantes servisus iha emprezas ida ajudantes servisus iha emprezas rihun ida nia leet”.
Ha’u triste tebes wainhira rona Governu hato’o tan proposta ba Presidente da Repúblika hodi husu Parlamentu Nasional atu ekstende tan Estadu de Emergénsia ba dala-12 fo impaktu makas povu ki’ik sira moris limita ba povu buka moris. Ami rekoñese imi nia esforsu no servisu tomak ne’ebé imi halo hodi salva ami no ita hotu husi PANDÉMIA COVID-19 ida ne’e.
Maibé Governu la hanoin atu responde ba nesesidades importantes ami hotu nian. Bandu total atividades ami nian ne’ebé ami halo hodi responde ba ami nia vida.
Taka dalan ba movimentasaun transportes públikus no privadus atu halo viajem ba munisípius, família no inan-aman sira atu haruka osan mai mós ladi’ak, haruka hahán mai mós ladi’ak. Oinsá atu selu kost, Eletrisidade, hola hahán no nesesidades seluk ne’ebé ami presija. Governu ida ne’e hadomi liu mak sira nia pozisaun, kabun no intereses privadus duké nia povu sira.
Governu ida ne’e buka atu salva de’it nia kadeira hodi haterus fali povu. Povu hamlaha, maibé sira dehan lae, povu halerik hela ba osan, aihan, no nesesidades importantes sira, maibé sira finji diuk no delek tiha. Husik ami hanesan loos balada ne’ebé na’in laiha atu haré.
“Imi bele buka oin ba.
Imi bele buka naran ba.
Imi bele salva imi nia kadeira ba.
Maibé favór boot ida, keta halo tanis ami povu, halo terus ami povu no hanehan ami povu.
Ukun ne’e imi foti fahe ba malu ba.
Kadeira ne’e imi foti fahe ba malu ba.
Riku no soin ne’e imi foti fahe ba malu ba.
Osan ne’e imi foti fahe ba malu ba.
Maibé favór boot ida, keta foti hotu ami nia iis moris”.
Obrigado.
Becora 31 Marco 2021
(Opiniaun Ne’e Hatun La’ós Responsabel Redasaun Naunil Media. Responsabel Husi Hakerek nain)
