FRETILIN, ho CNRT Husu Governu Tetu Didi’ak Molok Estende SS
Naunil Média (Díli), Bankada apoiu governu FRETILIN deputada Maria Angelica Rangel, inklúi bankada opozisaun CNRT Vergina Ana Belo, husu ba governu tetu didi’ak molok estende medida Serka Sanitária no Konfinamentu domisiliariu iha Munisípiu Dili, Baucau no Viqueque.
Reprezentante nain rua ne’e deklara asuntu ne’e tanba durante implementa Serka sanitaria maioria populasaun barak mak sai vitima, tanba la ai-han inklui nesesidade seluk.
“Iha medida serka sanitária ne’ebé dau-daun ne’e aplika ba munisípiu Dili, Baucau ho Viqueque fó implikasaun maka’as ba ekonómia iha rai laran ne’e, tanba laiha ema atu importa ai-han mai faan iha Munisípiu Dili”, informa deputada Fretilin iha debate pedidu estesaun estadu emerjénsia ba dala-12 iha plenária estraordinariu PN, kuarta (31/03).
Nia hatutan se bainhira governu iha planu hodi aumenta SS presiza mós kria kondisaun ba estudante inklui populasaun tomak atu labele hetan afeita husi implementasaun refere.
“Iha prevensaun Covid-19 normalmente governu hanoin katak halo serka sanitária. Maibé halo regra ne’e di’ak liu prátika iha suku ne’ebé mak afetadu de’it. maibé labele ba Kapitál tomak”, tenik nia.
Iha fatin hanesan deputada bankada CNRT, Vergina Ana Belo, husu ba governu atu buka mekanizmu oinsá mak bele rezolve kestaun medida serka sanitária ne’ebé fó impaktu ba ema barak nia ekonómia.
“Governu tenke hanoin ona nia mekanizmu saida mak atu halo hodi bele redus, tanba bainhira fó hela de’it subsidiu ba ema, karik serka sanitária estende to’o tinan ida ne’e”, nia aumenta.
Tuir rezolusaun Governu nú 15/2021 loron 15 fulan masu blokea ka aplika SS ba iha munisipiu Dili, Baucau, Viqueque to loron 2 fulan abril .
Nune’e tuir dadus ne’ebé relata husi Ministru saúde dadaun ne’e Timor- Leste rejista kazu covid-19 ne’e baixa hela hamutuk 415, rekopera ona 193, mate zero (0).Ana
