Kazu Covid-19: Viajen tan Iha Ermera Komfirmadu Pozitivu Nain Rua
Naunil Media (Díli), Portavoz Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr. Rui Maria de Araújo informa, kazu Covid-19 hahú viajen tan ba iha Munisípiu Ermera, komfirmadu pozitivu foun nain rua.
Portavoz Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr. Rui Maria de Araújo hato’o asuntu ne’e Naunil Media asesu karta komunikadu imprensa husi Sentru Integradu Jestaun Krize (SIJK), kinta (01/04).
“Evolui surtu covid-19 iha munisípiu Ermera ohin deteta kazu pozitivu na’in 2 iha Munisipiu Ermera. Kazu pozitivu 2 ne’e halo viajen husi Díli ba Letefoho, iha loron 26 Marsu. Iha Dili, sira hela iha aldeia Golgota, Suku Komoro. Ekipa konjunta saúde sei buka-tuir hela kontaktu-besik sira hotu”, dehan Dr. Rui.
Rui hatutan, ohin mós munisípiu Díli rejistan kazu iha kazu foun 37, kazu detetadu pozitivu iha Munisípiu Díli husi loron 7 Marsu to’o 1 Abril 2021, hamutuk hotu 493. Ekipa konjunta saúde rekolle, foku/cluster kazu pozitivu iha Díli sei iha cluster 48 maka sei nafatin hatudu atividade hada’et- tutan virus SARS-CoV-2, husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pité, Motael, Kulu-Hun, Lahane Oriental, Becora.
Nia informa, ba públiku katak Kazu grave 1 ho moderadu nain 3 iha fatin Izolamentu Vera Cruz, kontinua hatan atensaun husi ekipa medika. Sira nia kondisaun estável.
“Maski atividade prevensaun no mitigasaun ba surtu Covid- 19 iha Munisipiu Dili konsentra-liu iha Postu Administrativu Dom Aleixo, Vera Cruz, Nain Feto ho Crsito Rei, iha Postu Administrativu Metinaru & Ataúro, nafatin hala’o atividade vijilánsia sentinela ho rastreiru aleatóriu ba grupu de risku. Husi 1 de Marsu to’o 31 de Marsu 2021, Postu Administrativu Metinaro rekolle 78 amostras ba teste PCR, no Postu Administrativu Ataúro rekolle 306 amostras. Rezultadu husi Postu Administrativu rua ne’e negativu hotu kedas”. Tenik nia.
Nia apelu, ba komunidade iha fatin ne’ebé maluk sira rekuperadu sirano diskriminsaun sira, tamba sira ne’ebé sai husi fatin izolamentu, ekipa saúde sira sertifika no sira la iha ona risku atu hada’et-tutan virus ba ema seluk. Populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek pratíka nafatin medida prevensaun.
Entretantu dadus jeral, Kazu foun ohin 39, Kazu rekuperadu 3, Total kazu ativu 451, Husi total kazu foun ohin mane 20 no feto 19. Sintomátiku 4 no Asintomátiku 35. Husi horiseik mai ohin hamutuk hotu LNS halo 1228 testes PCR, inklui 137 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili.
Total pedidu autorizasaun esepsionál atu sai husi serka sanitaria iha Munisipiu Díli, horiseik loron 31 Marsu, hamutuk hotu 118. Sekretariadu CIGC responde hotu kedas, maibé 32 pedidus la prienxe kriteriu tuir Resolusaun Governu.
vit
