PR Lú Olo Dekreta EE, Ba DA-12, Bandu Sirkulasaun Internasionál Inklúi Nasionál

Naunil Media (Dili) liu husi Komunikadu imprenza ne’e fo sai husi Media Ofisial Palasiu prezidensial (01/04/2021). Prezidente Repúblika, (PR) Francisco Guterres Lú Olo, iha 31 marsu 2021, dekreta estadu emerjénsia dasanuluk-resin-rua ba loron loron tolu-nulu (30), hahú husi tuku 00.00 iha 3 abril 2021 no termina iha tuku 23.59 iha 2 maiu 2021, iha territóriu nasionál tomak.

Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votus-a favor 49, kontra 0 no Abstensaun 14. Molok ne’e, iha 29 marsu, Prezidente Repúblika rona uluk Konsellu Superior Defeza no Seguransa no Konsellu Estadu molok haruka pedidu autorizasaun ba Parlamentu Nasionál hodi deklara estensaun estadu emerjénsia ba dasanuluk-resin-rua.

Governu hato’o pedidu estensaun ba estadu emerjénsia ba Prezidente Repúblika tanba haree númeru kazu rejistadu ho Covid -19 iha Timor-Leste aumenta husi loron ida ba loron seluk.

Tuir dadus husi Organizasan Mundiál Saúde (OMS), iha 23 marsu 2021, infesaun SARs-Cov-2 mundialmente rejista kazu konfirmadu hamutuk 123 216 178 (sentu i vinte i tres milions duzentus i dezasseis mil sentu i sententa i oito) no hamate ema hamutuk 2 714 517 (dois miloins setesentas i catorze mil i kiñetas i dizassete) no hamate ema hamutuk 2 714 517 (dois miloins setesentas I catorze mil i kiñetas i dizassete) tanba Covid-19. Iha Indonézia, rejista kazu infesaun SARs-CoV-2 hamutuk 1 465 928 (um millaun kuatrusentus i sessenta i sinku mil setesentas e onze) no hamate ona 39 711 (trinta i nove mil setesentas i onze). Iha provinsia Nusa Tenggara Timur kazu konfirmadu hamutuk 12 012 no hamate ema na’in-327.

Dekretu Prezidente Repúblika, hanesan mós sira seluk, sei hasai parsialmente to’o agora, hodi deklara estadu emerjénsia, fó kbiit ba Governu bele foti medidas hodi suspende direitu konstitusionál balun sidadaun sira-nian, inklui ba sirkulasaun internasional, sirkulasaun iha rai-laran, direitu ba reuniaun no manifestasaun, direitu ba kultura, direitu ba edukasaun, direitu ba propriedade no inisiativa ekonómika privada no direitu rezisténsia.

Medida sira ne’e foti nu’udar medidas prevensaun no kombate moras covid-19 atu labele hadaet hosi ema ida ba ema seluk.
Governu impoin serka sanitaria no konfinamentu domisiliariu iha munisípiu Díli, Baucau no Viqueque nu’udar medidas atu hapara virus hadaet babeibeik husi ema ida ba ema seluk.

Prezidente Repúblika liuhusi Dekretu Prezidensiál husu Forsas Armadas Defeza Timor-Leste apoia Polísia Nasionál Timor-Leste no Departamentu Governamentál ne’ebé responsável ba saúde públika ba atividade nesesária ba fiskalizasaun no ezekusaun estadu emerjénsia.

Governu sei define medidas implementasaun ba estadu emerjénsia ba sanuluk-resin-rua.
Husi fulan marsu 2020, bainhira rejista kazu pozitivu ida ho Covid-19, Timor-Leste implementa kedas estadu emerjénsia. Implementasaun estadu emerjénsia ho medida oioin, hanesan medida preventiva no kontrolu covid-19 labele daet ba populasaun mak permite ita seidauk iha transmisaun komunitária.
Iha loron 31 marsu 2021, Timor-Leste rejista kazu pozitivu na’in-415.

Desde marsu 2020 to’o horseik, ema na’in-hamutuk 604 hetan infesaun husi SARs-CoV-2, sira seluk rekuperadu no seidauk rejista ema mate. * Pau