Covid-19: Ohin Díli Rejista Pozitivu Foun 34, Rekupera 24 no Ativu Baixa 461

Naunil Media (Díli), Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr, Rui Maria de Araújo, informa ohin Munisípiu Díli rejista tan kazu komfirmadu pozitivu foun 34, kazu jerál rekupera 24 no baixa ativu iha izolamentu 461.  

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS) Dr Rui Maria de Araújo hato’o asuntu ne’e Naunil Media asesu karta komunikadu imprensa husi Sentru Integradu Jestaun Krize (SIJK) fó sai, oras tuku 4 minutu 30, sexta (02/04). 

“Evolusaun surtu covid-19 iha munisípiu Díli Ohin,  iha kazu foun 34. Nune’e, kazu detetadu ka pozitivu iha ne’e husi loron  7 Marsu  to’o ohin, 2  Abril 2021, hamutuk hotu 527. Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, hetan revizaun hanesan tuir mai:  Ho nune’e, iha Munisipiu Dili, iha cluster foun 2, Ataúru ho Aldeia Rai Nain, Suku Bairro Pité. Totál iha cluster 50 maka sei nafatin hatudu atividade hada’et-tutan virus SARS-CoV-2, husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pité, Motael, Kulu-Hun, Lahane Oriental, Becora”, dehan Dr. Rui.

Eis Priemiru Ministru Dr. Rui informa, kazu pozitivu rua iha Ataúro, halo viajén husi Díli iha loron 31 Marsu. Iha Díli sira hela iha Bidaun Santana. Ekipa konjunta saúde buka-tuir hela sira nia kontaktu-besik iha Dili no mós iha Ataúro.

Tuir Nia, dadus jerál Kazu foun ohin 34, Kazu rekuperadu 24 no Totál kazu ativu 461.  Husi total kazu foun ohin mane 19,  feto 15,  Sintomátiku 2 no Asintomátiku 34. Husi horiseik mai ohin hamutuk hotu LNS halo 632 testes PCR, inklui 223 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili.

Totál pedidu autorizasaun esepsionál, atu sai husi serka sanitária iha Munisípiu Díli, horiseik   1  Abril, hamutuk hotu 167. Sekretariadu CIGC responde hotu kedas, maibé 24 pedidus la prienxe kritériu tuir Resolusaun Governu.

Nia dehan, kazu grave 1 ho moderadu nain 3 iha fatin Izolamentu Vera Cruz, kontinua hatan atensaun husi ekipa medika. Sira nia kondisaun estável. Kazu moderadu 2 hahú halo mobilizasaun no ezerisisu fiziku.

Ikus nia apelu,  ba komunidade iha fatin ne’ebé maluk sira rekuperadu sira hela bá, favor labele tauk, labela halo diskriminsaun ba sira, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk nomós   ba populasaun Timor-Leste tomak, liu-liu iha Munisipiu Díli, Baucau ho Viqueque atu nafatin  pratíka nafatin medida prevensaun sira hanesan.

1. Uza mascara.
2. Fase liman beibeik ho sabaun ka dezinfetante ruma.
3.  Evita kose liman ba matan, inus ho ibun.
4.  wainhira kumprimenta malu, lapresiza ka’er liman, bensa-liman, rei-malu ka haku’ak malu.
5. evita halibur malu barak.
6. Hamri’ik ka tur do’ok husi ema seluk, mínimu metru ida ho balun.(Vit)