Covid-19: Pozitivu Foun na’in-13 no Mate na’in-1
Naunil Media (Díli), Portavoz Kordenadór Forsa-Tarefa ba Prevensaun no Mitigasaun Surtu Covid-19 Dr Rui Maria de Araújo informa, Kazu covid-19 komfirmadu rejistan foun hamutuk na’in-13, mate na’in-1 no baixa ativu 485.
“Dadus jeral ba kazu Covid-19 foun 13, rekupera laiha no total kazu ativu naixa 485. Husi total kazu foun ohin mane 9 no feto 4 kazu hirak ne’e kuaze asitomátiku”, dehan Dr Rui Maria de Araújo ba jornalista sira liuhusi zoom meeting, tersa (06/4).
Nune’e Dr Rui dehan, husi horseik mai ohin hamutuk hotu LNS halo 343 teste PCR, inklui 243 teste ba ema ne’ebé halo pedidu atu hetan autorizasaun esepsionál hodi sai husi serka sanitária iha Díli. Husi loron 3 to’o 5 abríl hamutuk 173. Sekretaria SIJK responde hotu no aprova 169 ne’ebé priénxe criteria resolusaun governu.
“Evolui sertu Covid-19 iha Díli ohin deteta kazu foun 10 no total kazu pozitivu husi 7 Marsu, to’o ohin 6 Abríl 2021 hamutuk 622. Totál cluster 68 mak nafatin atividade hadaet-tutan virus SARS-CoV-2, husi ema ida ba ema seluk, liu-liu iha suku Madohoi, Bebonuk, Fatuhada, Komoro, Bairru Pité, Kampu Alor, Kulu-hun, Lahane Oriental no Bekora”, Dr. Rui informa.
Evolui surtu covid-19 iha munisípiu Likisá 3, hela iha Díli, maibé desloka ba suku Guisu ho suku Gugleur, Postu Adiministrativu Maubara nune’e ekipa SIJK nafatin buka tuir kontaktu besik sira. Munisípiu Baukau ohin rejista kazu foun na’in 3, nain-2 iha aldeia Kaibuilale, suku Kaibada, na’in-1 hela iha aldeia Uatuasa, suku Uatuhako, postu adiministrativu Venilale total kazu husi Baukau hamutuk 29, cluster 8.
Nia kresenta, matebian Covid-19 ohin dader hala’o ona funeral tuir protokolu husi Organizasaun Mundial Saúde (OMS) iha Metinaru.
Ikus nia apela, populasaun sira iha nafatin kumpri regras prevensaun covid-19 nian. (vit)
