Ajuda Vitima Inundasaun, Espoza PR Cidalia Agradese Madre Sira Nia-Laran Luak

Naunil Media (Dili), Espoza Prezidente Repúblika Cidalia Mouzinho Nobre Lopes Guterres agradese ba Madre sira husi FMA Balide nia laran luak ho Domin. Tanba bele ajuda ona komunidade ne’ebé afeita ba inundasaun.

Espoza PR deklara lia hira ne’e hafoin hamutuk ho Redi feto Timor Leste, Plan internasionál no komisaun sadia, vizita refujiadu iha Salaun Madre Filha De Maria Ausiladora (FMA) Balide hodi ajuda nesesidade bázika ba komunidade afetadu sira.

“Agradese ba Madre sira nia laran luak ba domin ba atensaun tomak ba alin oan sira hamutuk mós ho grupu animadores sira ne’ebé mak fo haksolok nafatin ba ki’ikoan sira iha momentu difisil ida ne’e” hatete Cidalia liu husi diskursu iha salaun (FMA) Balide, tersa 06/04/2021.

Cidalia hatutan iha vizita ne’e hakarak hakbesik ba vitima inundasaun tanba dezastre ne’e kuaze afeta ema barak mak sai vitima tanba lakon uma.

“Ami nia vizita ida ne’e hanesan ha’u ohin hatete ona katak ami hakarak mai hakbesik liu ba ita boot sira tuir loos iha horseik horbainrua. Maibé hanesan ita hotu hatene katak inundasaun ida ne’e kuaze afeta ba ita hotu Entaun kada familia ida idak preokupa ho ninian uma tanba ita mós tenke hadia uma selae ita moras hotu tanba ita hatene katak buat foer hotu hotu ne’ebé mak tun mai ne’e ita bele dehan katak ladiak entaun ida ne’e mós hanesan hola parte ida ba ita oinsá atu kontribui ba saúde familia nian”, dehan Cidalia .

Nia mós hatete Sofrementu inundasaun ne’e boot tebes ai-han ka sasán sira ne’ebé mak sira lori ne’e la too ba saida mak vitima sira lakon maibé ida ne’e hanesan hatutan netik nesesidade ka presiza loron ida rua nian.

“Ami nia vizita ida ne’e mós ami hakarak hatete katak Sofrementu husi inundasaun ida ne’e boot tebetebes entaun ai-han ka sasán sira ne’ebé mak ami lori mai ami hanoin katak la too saida mak ita boot sira lakon, saida mak naben tiha la’ós ita boot sira de’it maibé iha mós família sira seluk iha fatin sira seluk ne’ebé mak triste liu todan liu mak ba família sira ne’ebé mak lakon sira nia membru familia i balun kuaze familia tomak taka”nia tenik.

Iha fatin hanesan Madre superiora FMA Balide Me Angelita Gomez hateten tulun ne’ebé sira halo ne’e knaar sira nian duni no sira lapersija hein tan buat barak.

“Ida ne’e knaar ami nian la presiza hein buat buat barak maibé ami tulun buat ne’ebé ami bele, iha domingu ne’e ami prontu tiha ona atu Misa ami Hamri’ik iha ne’e haree iha ne’ebá bee tun labarik balun dehan ajuda lai ajuda lai entaun ami halai ba iha ne’ebá no ami lori sira mai”dehan Me Angelita.
Madre superiora ne’e hatutatan bainhira familia vitima sira to iha fatin sira komesa prepara ona fatin no hahan molok hetan ajudus husi parte seluk.

“Ami fo han tiha ba loron ida nia depois loron tuir mai komesa kolega balun hahú atu lori sasán mai Maibé buat ne’ebé furak iha ne’e mak ami mós tulun iha tempu ida ne’e oinsá atu bele hatudu loloos sira nia solidariedade konkretu dalaruma kualia beibeik mas atu realidade ne’e laiha nune’e hakarak hamutuk ho vitima ne’ebé hetan inundasaun” nia hatutan.

Nesesidade bázika ne’ebé apoiu husi espoza PR mak hanesan fos, mina, masi midar, susu ben, xá, supermi, sabaun, rinso, no seluk tan.

Tuir dadus familia ne’ebé refuzia iha fatin refere hamutuk uma kain 67. Komunidade hirak ne’e kompostu husi aldeia Alto Penal Suku Maskarinas postu administrativu Vera Kruz .*jos