Covid-19: Pozitivu Foun na’in-98, Rekupera 90 no Ativu Baixa 493

Naunil Media (Díli), Portavoz Kordenador Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo informa,  Kazu covid-19 komfirmadu rejistan foun hamutuk na’in-98, rekupera 90 no pasiente ativu baixa 493.

“Dadus jerál ba Timor-Leste tomak ohin, kazu foun husi loron 7 to’o  8  Abríl  totál hamutuk  98 (67 iha Dili, 31 iha Munisipiu sira seluk), Kazu rekuperadu iha loron  7 to’o 8  Abríl  hamutuk na’in 90 no totál kazu ativu ohin loron  8 Abríl 2021 hamutuk nain 493. Husi kazu ne’e total kazu foun ohin iha mane 57 no  feto 41. Kazu sira ne’e pasiente hotu-hotu asintomátiku”, dehan Portavoz Kordenador Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo Naunil Media asesu  liuhusi nota imprensa Sentru Integradu Jestaun Krize (SIJK), kinta (08/04).

Dr. Rui hatutan, husi loron 7 to’o  8   Abríl 2021 hamutuk hotu LNS halo 1.125 testes PCR, inklui 530 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisípiu Díli.

Eis Primeiru Ministru Dr. Rui relata, evolui  surtu COVID-19 iha Munisípiu Díli husi loron  7 to’o  8  Abríl deteta kazu foun 67. Nune’e, kazu detetadu ka pozitivu iha Munisípiu Díli husi loron 7  Marsu to’o  8  Abríl  2021, hamutuk hotu 689.

Ho baze ba informasaun ne’ebé disponível, ekipa konjunta saúde hafo fali revizaun ba foku propagasaun/cluster iha Munisípiu Díli ho baze ba ligasaun entre kazu iha area  geografika no expozisaun ba fonte infesaun. Suku sai nu’udar area geografika ne’ebé uza hanesan baze. Nune’e foku propagasaun/cluster  tuir area geografika suku nian ho fatin propagasaun seluk mós, hamutuk hotu iha 21 cluster.

Evolui surtu COVID-19 iha munisípiu Likisá husi loron 5  Abríl  2021 deteta kazu pozitivu 3 iha Postu Administrativu Maubara.  Ema sira ne’e, ba husi Díli. Oras ne’e, dadaun sira hala’o izolamentu iha Díli. Evolui  SURTU COVID-19 iha munisípiu Baukau husi loron  7 to’o 8  Abríl 2021 deteta kazu foun 5. Kazu pozitivu hirak  ne’e ba husi Díli. Hamutuk hotu iha Baucau iha 34 Kazus detetadus, iha cluster 11.

Evolui surtu Covid-19 iha Munisípiu Ermera  loron  7 to’o 8   Abril 2021 deteta kazu foun 20. Kazu pozitivu hirak ne’e ba husi Díli no lori fila mai izolamentu iha Dili. Ekipa konjunta saúde buka-tuir ona kontaktu-besik sira hotu.  Evolui surtu COVID-19 iha  munisípiu Kovalima, husi  loron  7  Abríl  2021 deteta tan kazu pozitivu ida iha Munisípiu Kovalima. Kazu pozitivu ida ne’e halo viajen husi Díli iha loron  2  Abríl 2021 no evolui surtu COVID-19 iha munisípiu Ainaru  husi loron  7  Abríl 2021 deteta kazu foun 5. Kazu pozitivu hirak ne’e ba husi Díli no lori mai izolamentu iha Díli. Ekipa konjunta saúde buka-tuir ona kontaktu-besik sira hotu.

Alende Kordenadór ne’e nia dehan, kazu detetadu ho kategoria moderadu na’in 3, iha Vera-Cruz/Lahane, alta ona iha loron  7   Abril no  kazu detetadu ho kondisaun grave na’in 1 maka sei iha Vera-Cruz/Lahane. Kondisaun  ohin loron   8  Abríl  2021 di’ak, maski sei nafatin uza oksijéniu liu husi kánula.

Nia apela,  ba populasaun Timor-Leste tomak, liu-liu iha Díli no Munisípiu sira ne’ebé afetadu ho inundasaun iha loron hirak ne’e nia laran, ba sira ne’ebé maski lakon uma, sasán no hela fatin, no tenki evakua ba fatin públiku sira, halo favor nafatin uza meius hotu ne’ebé iha atu hado’ok-an husi kontájiu moras Covid-19, liu-liu nafatin uza maskára, no faze liman beibeik ho bé no sabaun ka dezintetante ruma.

“Husu mós ba populasaun ne’ebé provizoriamente tenki hela iha sentru evakuasaun sira, atu kolabora ho ekipa konjunta saúde, hodi foti amostra ba análize laboratóriu. Ba populasaun ne’ebé la afetadu husi efeitu inundasaun, favor respeita nafatin regra sira ne’ebé Governu hatu’ur ona atu prevene moras Covid-19 da’et ba mai”. tenik nia. Vit