Matebian Armindo Stroke La’ós Covid-19, Líder Xanana: Doutór Labele ‘Bosok’ Povu
Naunil Media (Díli), Pasiénte Armindo Borges Mate stroke la’ós ba Covid-19, Líder karismatiku Kay Rala Xanana Gusmão husu Kordenadór Forsa-Tarefa ba Prevensaun no Mitigasaun Surtu Covid-19 Dr Rui Maria de Araújo la bele ‘bosok’ povu tanba ema moras kleur mak mate.
Líder karismatiku Kay Rala Xanana Gusmão ba jornalista sira iha, izolamentu Vera Kruz, Kaikoli (12/04).
“Ha’u la fiar doutór Rui Maria de Araújo no doutór sira seluk tanba ema moras kleur ona iha uma no idade ona depois lori ba hospital mak mate, dehan fali mate ba covid-19. Iha ne’e matebian nia família kuaze isin diak hotu tanba ne’e hau la simu”, eis Prezidente Repúblika Kay Rala Xanana halo intervensaun ba mate isin, iha fatin izolamentu Vera Kruz ho oin hirus.
“Ha’u sei ba hasai mate isin iha izolamentu laran. maibé hein lai, ha’u dehan ba imi (populasaun) kuandu moras boot lalika ba hospital ne’e sira haruka imi mate covid-19. Covid-19 ne’e problema, maibé la’os hanesan ne’e tanba buat ida covid-19 ha’u la’o haleu fronteira tomak ha’u hatene saida mak covid-19”, eis Primeiru Ministru Xanana haktuir.
Xanana hatutan, ekipa konjuta saúde ba kaer ema loron haat negativu fali ne’e la iha lojika, nia la’ós doutór maibé moras covid-19 kumpriende.
“Protokolu saúde sira ba halo prevenasun ne’e, ha’u respeita tebe-tebes, maibé matebeian ne’e bá hospital estruk mak mate, ema seidauk covid-19 dehan covid-19. Ha’u respeita estadu nian serbisu, mas tenke serbisu didiak mak foin ita fiar”, eis Primeiru Ministru ne’e realsa.
Tuir observasaun jornalista Naunil Media iha izolamentu Veru Krus líder karismatika tuur tiha portaun izolamentu nian, la kelaur Ministra Saúde (MS) Dra. Odete Maria Freitas Belo mosu mai líder karismatiku Xanana tuur tiha ona oin portaun, nune’e mosu diskusaun entre Mistera Saúde ho líder Xanana Gusmaun kuaze oras ida.
Tuir planu husi SIJK nian tuku 9:30 lori mate isin ba kaoi iha semitériu Covid-19 Metinaru, maibé mosu líder Xanana intervene to’o agora mate isin seidauk ba fatin ne’ebé governu prepara ona. Pau/Ipi