Naunil Media (Díli), Portavoz Kordenadór Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo informa,  Kazu covid-19 komfirmadu rejistan foun hamutuk na’in-55, rekupera na’in-60   no baixa ativu 560.

Tuir Dr. Rui haktuir evoluisaun iha Munisípiu Díli   deteta kazu foun 43. Nune’e, kazu detetadu ka pozitivu iha Munisípiu Díli, sura kumulativamente husi 2020, to’o ohin, 16 de Abril de 2021, hamutuk hotu 1.006.

kazu foun iha Munisípiu Díli nia laran, ohin fatin sira ne’ebé deteta kazu foun hanesan Komoro na’in 12, Santa Kruz na’in- 9, Sentru Konvensaun Dili (CCD) 6, Suku Fatuhada na’in 6,  Caicoli, Becora, Laboratoriu Nasional Saúde na’in-2 no Vila-verde, Mascarenhas, Madohi na’in-1. Iha Munisipiu Dili, hamutuk hotu, sei nafatin iha cluster 23.

Evolui surtu Covid-19 iha munisípiu Aileu  husi horiseik mai ohin, deteta tan kazu kazu foun 1, munisípiu Manufahi  husi horiseik mai ohin, deteta tan kazu foun 11.

“Dadus jerál ba Timor-Leste tomak totál kazu konfirmadu kumulativu (sura husi 2020) 1.193, Kazu detetatu foun ne’ebé relata iha loron  16 Abríl 2021 hamutuk 55 (iha  Dili  43,  iha Munisipiu seluk 12). Husi total kazu detetadu foun ohin: mane 29, feto 26, Husi total kazu detetadu foun ohin: Sintmátiku 1, asintomátiku 54, Husi total kazu detetadu foun ohin, 39 (70%) maka deteta tamba halo teste ho razaun atu halo viajen/ka halo ona viajen ba Munispiu hafoin deteta pozitivu. Iha Kazu rekuperadu ne’ebé ralata ohin hamutuk 60 no totál kazu ativu ohin hamutuk 560”, dehan Portavoz Kordenadór Forsa-Tarefa ba Prevensaun no Mitigasaun Surtu Covid-19  Dr Rui Maria de Araújo ba jornalista sira liuhusi komunikadu imprensa, sexta (16/04).

 

Dr. Rui dehan, husi horiseik mai ohin, hamutuk hotu Laboratóriu Nasionál Saúde halo 1139 testes PCR, ho detalles hanesan tuir mai:

1. Vijilánsia sentinela:234.
2. Rastreiu ba kontaktu (Contact tracing): 142.
3. Rastreiu Aleatoriu (Random Screening): 159.
4. Viajen sai husi serka sanitária Munisipiu Dili:730.
5. Viajen internasionál: 20.
6. Follow up iha quarentena: 34.

Total pedidu autorizasaun esepsionál atu sai husi serka sanitaria iha Munisipiu Dili, iha dia 14 &  15 de Abril, hamutuk hotu 325. Sekretariadu CIGC responde hotu kedas, maibé 15 pedidus la prienxe kritériu tuir Rezolusaun Governu kona ba Serka Sanitária iha Munisipiu Dili.

Informasaun adisionál, Dr. Rui informa, Iha kazu detetadu sintomátiku lijeiru balun, oras ne’e iha fatin izolamentu, maka keixa hanesan parte husi sintomas, susar/la bele atu horon morin ka dois. Ida ne’e parte husi sintoma Covid-19. Favor labele pániku, tamba maioria ema ne’ebé hetan sintoma hanesan ne’e, sei rekupera fali ninia kapasidade atu horon sasan. Iha izolementu Vera Cruz iha kazu pozitivu nain 7. Ida grave, nain 6 moderadu. Husi kazu pozitivu nain 7 ne’e, 3 iha area medisina interna, 4 seluk iha obstetrisia.

 Iha Kazu grave ne’ebé iha Vera Cruz, nafatin uza ventilador & aimoruk balun tuir protokolu ne’ebé Timor-Leste adopta, maibé iha estadu kritiku: isin sei manas nafatin no dada-i’is ho asisténsia mákina.

Ikus nia apelu, mosu dezastre naturál ne’ebé akontese iha teritorial afeta maski lakon uma, sasán no hela fatin, no tenki evakua ba Sentru Akollimentu sira, halo favor nafatin uza meius hotu ne’ebé iha atu hado’ok-an husi kontájiu moras Covid-19, liu-liu nafatin uza maskára, no faze liman beibeik ho bé no sabaun ka dezintetante ruma.Vit