Feliciano: APORTIL Negosia Ró Institutu Transip 2, Subtitui Berlin Nakroma
Naunil Media(Díli), Relasaun ona ho kondisaun Ró Berlin Nakroma avaria, Diretór Kabotajen Nasionál (DKN), Feliciano da Costa Correa informa, Administrasaun Portu Timor-Leste (APORTIL) aluga Ró transip 2 husi Indonézia, maibé sei iha faze negosiasaun.
Tuir DKN Feliciano, Ró Berlin Nakroma ne’ebé maka dadaun ne’e avaria hela ne’e, kuaze ema barak hatene, entaun Ró refere avaria iha loron 21 fulan Dezembru 2020, momentu ne’e hahú halo pedidu ba prezidente APORTIL hodi halo preparasaun ba materiál saida maka aat.
“Ha’u-nia departamentu ne’e, halo hela manutensaun ou followup ba buat sira ne’ebé maka aat, hodi halo lista iha janeiru nia laran, hodi apropoin ba prezidente rasik, i foin dadauk maka fó sai tenderizasaun”, dehan DKN Feliciano da Costa Correa ba Naunil Media, iha Portu Dili, segunda (20/04).
“Maibé ami sei haree liu ba administrasaun atu bele asegura movimentasaun ró institutu ne’ebé maka oras ne’e dadaun ami prepara hela, hodi mai subsititui Berlin Nakroma nia operasaun. Bainhira ita-nia Governu presija ajuda tula umanitaria ruma”, Nia hato’o.
Feliciano afirma, manutensaun ba Ro Berlin Nakroma sei fase tenderizasaun, maibé halo manutensaun iha Surabaia Indonézia tuir orariu iha fulan Maiu durante loron 45.
“Maibé ami mós sei estuda hela oinsa hodi bele minimiza obstakulu sira ne’ebé impede ba manutensaun nian ne’e, entaun bele to’o fali Setembru hanesan ne’e maka foin operasaun normál fali”, nia deklara.
Nia dehan subtitui Ró institutu transip 2 akumula pasajeiru hamutuk 300 no tula kareta 25. Kona-ba folin bilete nafatin 8$ ba Oecusse no ba Ataúro 4$. RIT/JJF
