Eis PR José: Governu Hanoin Didiak Mak Simu Tipu Vasina Sinovac 100. 000
Naunil Media (Díli), Eis Prezidente Republika no Premiadu Novel Ba Paz, Jose Ramos Horta husu ba governu atu hanoin no analiza didiak simu tipu vasina Sinovac ne’ebé governu Xina aseita ona atu apoiu doses hamutuk rihun 100,000 mai Timor.
“Hau rona no hare duni informasaun media sira fo sai kona ba governu xina ne’ebé aseita ona atu apoiu vasina tipu Sinovac hamutuk 100,000 doses. Maibé sistema COVAX ne’ebé lideradu husi Oreganizasaun Mundial Saúde mak eskolla ona vasina tipu Astrazeneca ba TL no nasaun lubuk ida. Tanba ne’e wainhira Governu hakarak simu tipu vasina Sinovac hamutuk doses rihun 100,000 ne’eee presiza estuda didiak vasina ne’e nia efikasia kona ba nia protesaun ba sidadaun sira labele hare fali kustu vasina ne’e,”hatete Eis Prezidente Republika no Premiadu Novel da Paz, Jose Ramos Horta ba jornalista iha Rezidensia PM Farol Tersa 27/04/2021.
Premiado Novel da Paz ne’e hatutan nia mós la akompaña imformasaun ko naba vasina Xina maibé ida nia akompaña bebeik mak vasina ne’ebé iha nasaun Europa no mós Amérika ne’ebá sira iha esperensia ne’ebé klean tebes liu liu kona ba tipu vasina Astrazeneca ne’e.Hanesan semana hirak ne’e iha kontroversia tanba orgaun politiku sira iha nasaun Europa no mós Amérika sira hare iha failansu oan ruma sira trava kedas, maibé sira autoriza hikas uza vasina Astrazeneca ne’e maske iha kritika barak.
Ramos hatutan diak liu Timor Leste kontinua koopera nafatin ho sistema Covax no Organnizasaun Mundial Saúde para kontinua fornese vasina tipu Astrazeneca mai TL, kona ba vasina Sinovac governu.
“Xina dekrlara ona katak sei tau prioridade ba nia populasaun sira ho rezerva vasina ne’ebé sira iha, tanba ne’e prontu wainhira vasina ne’e too diak liu fo ba nia sidadaun sira ne’ebé serbsiu iha ne’e, maibé ita tenki konsentra no mantein ho tipu Astrazeneca ne’ebé iha,”tenik Horta.
Ramos hatutan produsaun vasina astrazeneca liu husi sistema COVAX no organizasaun saúde mundial mak diak liu ba TL tanba ne’e governu lalika hili tan tipu vasina seluk atu Hatama mai Timor Leste.
Eis Prezidente Republika no Premiadu Novel da Paz Jose Ramos Horta husu ba populasaun iha teritoriu laran keta fiar deklarasaun husi deputadu/a kona ba efeitu at husi tipu vasina Astrazeneca ne’e tanba sira la’ós sientista kona ba saúde nia, nune’e husu populasaun sira kontinua hakbesik an santru saúde sira hodi simu vasina Astrazeneca.
“Ha’u respeita deputadu/a sira iha parlamentu nasionál, no ha’u rona balun foin dadauk koalia kona ba kontra vasina tipu Astrazeneca ne’ebé dadaun ne’e populasaun barak simu ona, Parese sira estuda barak liu, no sientista liu fali organizasaun mundial saúde no sientista atus ba atus ne’ebé dadaun ne’e halao serbisu iha organizasaun mundial saúde iha zenebra ne’ebá,”dehan Jose Ramos Horta. Jos/Lipe
