Embaxadór Mohamed: Agradese Ba TL Nian Apoiu Solidadaridade Ba Povu Árabe Saharauí
Naunil Media (Díli), Embaixadór Repúblika Demokrátika Árabe Saharauí ba Timor-Leste, Mohamed Slama Badi husu, agradese Estadu Timor-Leste (TL) nian apoiu tomak no solidaridade ba luta Árabe Saharauí ukun rasik-an.
Embaixadór Repúblika Demokrátika Árabe Saharauí ba Timor-Leste, Mohamed Slama Badi ba jornalista hafoin audiénsia ho Prezidente Repúblika, Francisco Guterres ‘Lú Olo’, iha Palásiu Prezidensiál Nicolau Lobato, Bairru Pité, tersa (27/04).
“Ha’u mai iha maiu 2010, hanesan ema estranjeiru, maibé agora depois 2011 fila ba ha’u-nia rai nu’udar ema timor oan ho domin, hanesan maubere oan ida. Ha’u simu apoiu tomak husi nivel hotu-hotu, hahú kedas husi Prezidente Repúblika, Governu, Ministériu Negosiu Estranjeirus, partidu polítikus, sosiedade sivíl, tipu apoiu hotu-hotu no fó solidariedade”. Dehan Embaixadór Mohamed.
Diplomata Árabe Saharauí ne’e dahan, nasaun Timor-Leste no Árabe Saharauí sei kontinua hametin relasaun fraternal no manifesta vontade polítika atu serbi ba bem-estar Povu nian. Tanba povu Timor-Leste hatudu Povu ne’ebé moris ho valores no prinsípius no hatene saida mak sofrimentu no luta hodi hetan ninian direitus. Timor-Leste riku ho nia istória luta ba independénsia ninian.
“Ha’u sente triste no ho orgullu. Sente parte husi Povu ida ne’e, ha’u fila hanesan Maubere ida, nakonu ho sentiment no esperiénsia akumuladu. Povu ki’ik ho prinsípiu no valores boot. Hamriik tuir dalan to’o hetan progresu maske hetan difikuldade ekonómiku, krize, dezastre naturál. Povu ida ne’e hatudu husi loron ba loron sai Povu boot ida,” Embaixadór ne’e hateten.
Nia dehan tan, Timor-Leste nu’udar estadu ne’ebé rekoñese Repúblika Demokrátika Árabe Saharauí nu’udar nasaun no loke nia reprezentasaun diplomátika iha Díli. Estadu Timor-Leste apoiu no solidariza luta Povu Saharuí atu hetan ninian independénsia.
“Ha’u sei hala’o nia misaun diplomátika iha Austria, hafoin ramata nia kna’ar iha Timor-Leste”. tenik nia. Pau
