Kumunidade Suku Maskarenas Simu Programa Sexta Bázika, Kumpri Regra Prevensaun Covid-19
Naunil Media (Díli), Xefe Suku Mascarenhas Rui Ilidio Araújo hateten, komunidade husi suku Maskarenas simu programa sexta bázika tenke kumpre regra prevensaun covid-19 ne’ebé governu implementa.
Xefe Suku Mascarenhas, Rui Ilidio Araújo ba Naunil Media, iha Estadium Múnicipal oin, sábadu (01/05).
“Ne’e programa Guvernu kona ba sexta bázika ne’ebé mak hala’o tiha ona primeira semana horseik ohin no tama ba tersera parte aldeia rua mak hanesan aldeia Zero Tres no Baixo PB, Mesmu serka sanitaria ami la’o nafatin maibé uza meus ne’ebé mak iha antes tama uza maskara, fase liman no distansia sosial”, dehan Xefe Suku Mascarenhas ne’e.
Autoridade Lokál ne’e hatutan, kona ba totál uma kain ne’ebé agora simu la’o hela ne’e seidauk konfirma tanba lista iha MTCI no mós iha Suku rasik, agora loron tomak ne’e sei la’o hela.
Rui dehan, Iha suku Maskariñas agora dadaun Aldeia rua mak distribuisaun la’o hela falta aldeia haat mak seidauk, Aldeia iha Suku Mascarenhas hamutuk neen, totál uma kain ne’ebé mak atu hetan sexta bázika hamutuk 6667.
Iha fatin hanesan xefe Aldeia Zero Tres António Pereira apresia ho programa sexta bázika ne’e tanba horseik to’o ohin la’o ho di’ak. Iha aldeia Zero Tres totál uma kain hamutuk 942 mak simu ona no 16 familia mak seidauk simu, se 16 uma kain ne’e mak ohin la simu segunda kontinua fali.
iha okaziaun ne’e benefisiariu Aldeia Zero Tres, Lindalva Santos, nia parti senti kontenti ba buat ne’ebé Guvernu fó mesmu uituan ka barak tenki agradese no la bele reklama.
“Ita tenki simu nafatin ho liman rua saida mak Guvernu fo ba ita uituan ka barak ami nafatin agradese barak ba guvernu nia ajuda ne’ebé mak fó ona mai durante estadu emerjensia ne’e”.dehan Lindalva Santos Tuir observasaun Naunil Media nota katak, populasaun sira ne’ebé mak atu ba simu sexta bázika ne’e kumpri Regra molok sira simu fase liman, uza maskara no distansiamentu fízika. Entretantu distribuisaun programa refere husi Kompaña PARATRIZEL LDA.Jos
