SEKOMS Sei estabelese Rádio Ba Ema Ho Defisiénsia
Naunil Media (Díli) Sekretáriu Estadu ba Komunikasaun Sosiál, (SECOMS sigla portugés) Merício Juvinal dos Reis “AKARA”, hamutuk ho Diretór Nasionál Promosaun no Dezenvolvimentu Mídia Lokál-DNPDML, Paulino Kintas, hala’o vídeo konferénsia ho Diretora Ezekutiva Rádio Komunidade ba Ema ho Defisiénsia.
Iha Video Konfernsia ne’e governante nain rua ne’e konversa ho Emerensiana Alves, no Fundadór Fundasaun AHISAUN, amu Adriano Olan, tersa-feira, loron 04 fulan-maiu, tinan 2021, iha sala reuniaun SEKOMS, Palásiu Governu, Dili.
Sorumutu liuhosi vídeo konferénsia ne’e ho objetivu atu atualiza informasaun kona-ba preparasaun ba estabelesimentu rádio komunidade ba ema ho defisiénsia sira.
Liuhosi vídeo konferénsia ne’e, Diretora Ezekutiva Rádio Komunidade ba Ema ho Defisiénsia, Emerensiana Alves, atualiza informasaun ba SEKOMS kona-ba sira nia preparasaun atu harii rádiu komunidade ba ema ho defisiénsia, ho ninia vizaun no misaun maka atu hamenus no halakon diskrimisaun ba ema ho defisiénsia sira iha Timor-Leste liuhosi Rádio Anin Laloran FM.
Emerensiana Alves konsidera estabelesimentu rádiu ne’e importante tebes nune’e bele promove atividade advokasia sira liuhosi meiu komunikasaun rádiu.
“Estatutu rádiu komunidade ba ema ho defisiénsia hetan ona legalizasaun husi Ministériu Justisa inklui sertifikadu ba kriasaun rádiu komunidade ne’e no sira mós iha ona espasu atu hala’o servisu ho rekursu umanu ne’ebé sufisiente hodi produz programa sira,” hateten nia.
Iha fatin hanesan, Sekretáriu Estadu ba Komunikasaun Sosiál, Merício Juvinal dos Reis “AKARA”, hateten rádio komunidade ne’e sei jere diretamente husi ema ho defisiénsia sira ne’ebé hamahan-an iha Fundadaun AHISAUN no SEKOMS sei kontinua akompaña funsionamentu servisu iha rádio komunidade ne’e.
“Apresia ho preparasaun ema ho defisiénsia sira, liuliu iha área rekursu umanu no infraestrutura hodi estabelese rádio komunidade ne’e,” hateten “Akara”.
Ezekutivu ne’e realsa SEKOMS sei fó apoiu tékniku no ekipamentu ba rádio komunidade ema ho defisiénsia nune’e bele divulga informasaun no programa sira ba públiku.
Governante ne’e husu ba rádio komunidade ba ema ho defisiénsia atu koolabora ho Diresaun Nasionál Promosaun no Dezenvolvimentu Mídia Lokál nune’e bele dezenvolve programa edukativu sira no divulga programa sira kona-ba misaun no vizaun ema ho defisiénsia nian, aleinde programa entretenimentu.
Iha biban ne’e, Diretór Nasionál Promosaun no Dezenvolvimentu Mídia Lokál, Paulino Kintas, hateten teknikamente DNPDML prontu atu fó apoiu ba rádio komunidade ba ema ho defisiénsia hodi dezenvolve no dezeña programa sira ne’ebé atu publika.
Paulino Kintas afirma ema ho defisiénsia sira nia lian importante tebes hodi kontribui ba prosesu dezenvolvimentu nasionál.* Nlw
