Akademista Camilo: 20 De Maiu Loron İmportante ba TL
Naunil Media (Díli), Akademista Dekanu Fakuldade Siénsias Sosiais, Universidade Nasionál Timor Lorosa’e ( FCS-UNTL sigla portugéus), Camilo Ximenes Almeida, hateten loron 20 de Maiu 2021 aniversariu restaurasaun idependensia ba dala 19, hanesan loron importante ba povu Timor-Leste .
“Ha’u hanoin loron 20 Maiu restaurasaun independensia ba dala 19, nuudar loron espesial ba povu hotu-hotu iha Timor-Leste, maibé tan de’it situasaun Covid-19 ne’ebé kuase laiha rohan ita labele selebra loron importante ida ne’e”, Hateten akademista (FCS-UNTL) ba Naunil Media via whatsapp, sesta (08/05).
Nia hatutan, maibé nuudar sidadaun ne’ebé di’ak bele mós halo reflesaun kona-bá prosesu barak ita liu, la fasil ita hetan independensia ho sakrifisu boot ne’ebé Timoroan sira halo, ohin ita livre, ohin ita ukun an, Dehan manorin (FCS-UNTL) Camilo Ximenes Almeida.
“Maibé, labele kontenti ho ida ne’e Tanba Timor oan barak sakrafika nian an, to’o agora laiha oportunidades ba sira atu eskola, laiha serbisu ba sira liu liu sira ne’ebé mak fó kontribuisaun makas hanesan Veteranus no kombatentes libertasaun, kaixa klandestina sira, juventude loriku aswain sira no membrus organizasaun juvinil suporte makas ba luta maibe laiha fatin ba sira”, Tenik nia.
İkus liu, nia dehan komemora restaurasaun independensia 20 fulan Maiu ba dala 19, nuudar reflesaun ba Timor oan hodi hateke fali ba kotuk, relembra fali ita nian pasadu, maibé ita nia ezijensia ba futuru tanba maske ita liu tempu ne’ebé difísil, maibé ita bele ultrapasa no agora sé mak hatene ita labele ultrapasa situasaun agora, nune’e husu Timor oan atu iha konsensia hodi hatudu ba mundu katak ita bele duni, ita nia bele laos uluk de’it, maibé agora no ba futuru. Nia hakotu.Lop
