PM:Taur Inagura Postu UPF iha Balibo Hodi Kontrolu Pasazen-Ilegal

Naunil Media (Díli), Primeiru Ministru (PM), Taur Matan Ruak Inagura postu unidade polisia  fronteira UPF ne’ebé lokaliza iha We-Fauk, Balibo, Múnisípiu  Bobonaro hodi kortola pasazen illegal.

“Postu ida ne’e kooperasaun ho Austrália, ninia objetivu mak reforsa kontrolu fronteira evita illegal sira tama mai, fatin ida ne’e sei asume papél importante ida, hanesan embaixadór hateten la’os halo de’it iha ne’e sei halo tan iha fatin seluk, husi Austrália nia parte Timor nia parte sei halo Postu neen para bele fó fatin di’ak ba UPF sira hodi tau matan ba ita nia fronteira”, Primeiru Ministru Taur Matan Ruak iha Intervensaun, ne’ebé Naunil media asesu liu husi  MediA Gabineti Primeiru Ministru, Sabadu (08/05).

Nia hatutan, kooperasaun Timor-Leste ho Austrália iha aréa barak hanesan Saúde, Edukasaun, Governasaun di’ak, Agrikultura no área oi-oin inklui seguransa nian liuhusi Timor- Leste Police Development Program, (TLPDP) parseria di’ak ho Polisia Nasionál Timor-Leste (PNTL).

“Seguransa de’it la to’o, presiza autoridade lokal sira iha nível munisípiu, postu, suku, aldeia no komunidade, inan-aman sira tenke fó kontribuisaun liu-liu hanesan iha tempu agora la’ós de’it ema lori sasan mak ba mai, dala ruma bele lori tan droga no buat seluk tama hodi estraga ita-nia oan sira nia futuru”, Tenik eis prezidenti RDTL Taur Matan Ruak.

Ikus liu, nia dehan Primeiru Ministru hakarak lori governu no povu Timor nia naran agradese governu liu husi ninia embaizada iha Timor-Leste.

Partisipa iha seremónia inaugurasaun ne’e, Vise-Ministru Interiór, Antonio Armindo, Embaizador Austrália Peter Roberts, Espoza Primeiru-Ministru, Dra. Isabel da Costa Perreira, Komandante Jerál PNTL, Komisariu Polisia, Faustino da Costa, Komandante UPF, Reprezentante Timor- Leste Police Development Program, (TLPDP) hamutuk ho Autoridade lokál no bainaka konvidadu sira. #*Jos