Zacarias: Promete Sei Rezolve Problema Ne’ebé CPLP Hasoru

Naunil Média (Díli), Sekretáriu Ezekutivu Designadu ba Comunidade dos Países da Língua Portuguesa (CPLP), Zacarias Albano da Costa promete bainhira simu ona knár sei rezolve problema ne’ebé CPLP hasoru daudauk.

“CPLP mós atravesa momentu difisil, liu-liu iha parte finanseira hanesan konsekuénsia, tanba nasaun balun la selu sira-nia kuotas, mas ha’u hanoin situasaun ida-ne’e sei muda iha futuru, muda partikularmente bainhira ha’u sei asume kargu nu’udar Sekretáriu Ezekutivu CPLP nian,” Dehan Zacarias Albano ba jornalista, hafoin halo audiénsia ho Primeiru-Ministru (PM), Taur Matan Ruak, Segunda (10/05) iha rezidénsia Farol, Dili.

“Problema barak ita tenke rezolve, señór Primeiru-Ministru rasik fó konsellus bar-barak, ita hatene iha 2014 kuandu simeira hala’o iha Dili, señór Primeiru-Ministru nia hatene didi’ak problema ne’ebé iha,” tenik Zacarias.

Eis Ministru Negósiu Estranjeiru no Koperasaun ne’e dehan previléjiu boot, tanba nu’udar timoroan no tempu ona ba Timor-Leste atu lidera organizasaun internasionál hanesan CPLP.

“Ha’u sente previléjiu boot, tanba tinan ida-ne’e ita selebra 20 anus CPLP nian, mas iha tinan 25 liu bá, ha’u rasik nu’udar membru koordenadora frente diplomátika hamutuk ho Doutór Ramos-Horta, Doutór Marí Alkatiri, Enjiñeiru Mário Carrascalão no Doutór José Luís Guterres, ami partisipa iha simeira konstitutiva CPLP nian,” haktuir Zacarias.

Nia dehan, mandatu nu’udar Sekretáriu Ezekutivu CPLP sei hahú, bainhira simeira Xefe Estadu no Xefe Governu CPLP sira konfirma liu husi simeira refere ne’ebé sei hala’o iha loron 17 fulan-Jullu iha Luanda Mosambike.

Mandatu nu’udar Sekretáriu Ezekutivu CPLP durante tinan rua, hahú husi 2021 to’o 2023, no posibilidade sei extende to’o 2025. Latu