PR “Lú Olo”: Fó Indultu Ba Prizoneiru Na’in 15

Naunil Media (Díli), Prezidente Repúblika (PR) Francisco Guterres ‘Lú Olo’Hateten ezerse ninia kompeténsia konstitusionál hodi fó indultu ba prizoneiru na’in-15, iha loron 20 de Maiu 2021, selebrasaun Aniversáriu Restaurasaun Independénsia Timor-Leste (RDTL) ba dala-19.

“Liuhusi Dekretu Prezidente Repúblika ne’ebé publika iha Jornal Repúblika iha 19 Maiu 2021, ho númeru 25/2021, 26/2021, 27/2021, 28/2021, 29/2021, 30/2021, prizoneiru na’in-6 hetan liberdade totál, prizoneiru na’in-4 hetan indultu parsial fulan-6 husi pena prizaun liuhusi Dekretu Prezidente Repúblika númeru 31/2021, no prizoneiru na’in-5 hetan indultu parsial ho metade pena prizaun liuhusi Dekretu Prezidente Repúblika númeru 32/2021”, Hateten Prezidenti Repúblika Francisco Guterres ‘Lú Olo’ liu husi komunikadu imprensa iha Palásiu Prezidensial Nicolau Lobatu Bairo Pite, Loron kuarta (19/05).

Xefe Estadu uza nia kompeténsia eskluziva fó liberdade totál ba Francisco de Araújo, Thomas Freitas Martinho, Anacleto dos Santos, Mário Pereira da Costa, Adolfo Assunção de Jesus no Jaime Amaral Ximenes.

Indultu parsial ba prizioneirus hodi hamenus pena fulan-6 ba Elvis Hornai da Cruz, José Fernandes, Renato Hornai da Cruz no Tiago Soares Almeida.

Ba prizoneirus Arminda Soares, Geremias Sequeira Andrade, Henrique dos Santos, Ivo Soares no José dos Santos hetan Indultu parsial ho metade pena. Dekretu Prezidente sira ne’e sei tama iha vigor iha 20 maiu 2021.

 Tuir artigu 85, alinea 1 husi Konstituisaun Repúblika hateten katak Prezidente Repúblika de’it mak bele fó indultu ka hamenus kastigu, depoisde rona Governu ne’ebé konjuga ho artigu 3 no 4 Lei númeru 5/2016, 25 Maiu.

Definisaun saida mak indultu no hamenus kastigu haktuir iha Kódigu Penál ne’ebé aprova ho Dekretu-Lei númeru 19/2009 no Lei númeru 15/2016 mak regula kondisaun no prosedimentu atu fó indultu ka hamenus kastigu.

Prezidente Repúblika halo nia kompeténsia tuir de’it lei haruka. Fó indultu no komutasaun ba pena ba prizoneiru sira nu’udar kompeténsia eskluziva Prezidente Repúblika nia tuir artigu 85 Konstituisaun no Kódigu Penál no Lei númeru 5/2016.

Ba krime organizadu, krime transnasionais, terorismu, tráfiku umanu, korupsaun ativa maske kumpri tiha ona um tersu pena maibé lei bandu atu fó indultu.

Ba krime sira ne’ebé la grave, hafoin kumpri um tersu pena, Prezidente Repúblika bele fó indultu. Prezidente Repúblika bele fó indultu ho razaun umanitaria ninian.#Pau