PR “Lú Olo” : Sistema-Edukasaun Online Seidauk Preparadu La-Garantia ba-Estudante, Husu-Governu Hadia
Naunil Media (Díli), Prezidenti Repúblika (PR) Francisco Guterres “Lú Olo”, Hateten Sistema edukasaun online seidauk preparadu no la garantia ba estudante sira, husu governu hadia.
“Labarik sira fulan hira ona labele bá eskola. Governu halo esforsu bo’ot hodi garante katak labarik sira bele kontinua sira nia prosesu aprendizajen iha uma, maibé realidade hatudu katak sistema edukasaun seidauk preparadu hodi garante katak alunu sira iha territóriu laran tomak iha asesu ba materiál no ba konteúdu aprendizájen, liuhusi internet ka televizaun”, Hateten Prezidenti Repúblika (PR) Francisco Guterres “Lú Olo” ba jornalista sira liu husi mensajen 20 de Maio 2021 iha Palásiu Prezidenti Nicolau Lobato bairu Pite, kinta (20/05).
Xefe estadu hateten governu tenke hadia sistema edukasaun ho tenkolijia ida ne’ebé kualidade hodi garante futuru estudante sira nian.
“Urjente ba governu hanoin filafali oinsá hadi’ak ita-nia sistema edukasaun. Tempu ona hodi harii eskola ida moderna, ho kondisoins atuais hodi forma profesór sira ho kapasidade atu uza teknolojia foun sira hodi prosesu aprendizájen ba ita-nia oan sira bele lao ho kualidade di’ak ho kurríkulun ida atualizadu no adekuadu hodi prepara futuru Nasaun-nian ho garantia no sustentabilidade”, Tenik PR Francisco Guterres “Lú Olo”.
Ikus liu, nia dehan edukasaun ho kualidade mak sei garante futuru dignu ba estudante iha nasaun ida ne’e, Hakotu xefe estadu, “Lú Olo”.*Jos
