Uma-Kain 7 Iha Aldeia Lakulela Suku Guruça Quelicai Seidauk-Simu Sesta-Bazíka
Naunil
Media (Díli), Habitante Krispin Gaio hateten,Uma kain 7 iha aldeia Lakulela
Suku Guruça Postu administrativu Quelicai munisípiu Baucau seidauk
simu Sesta bazíka tanba naran tama reklamasaun,
komunidade husu simu sesta bazíka la presiza tuir lista subsidiu $ 200
nian tanba oras ne’e infrenta hela hamlaha.
“Ami nu’udar povu aileba ami hakarak hato’o ami nia problema ne’ebé hasoru lapresiza hein tan la’o tuir lista subsidiu $ 200 nian tanba ami hamlaha ona, bainhira mak ami hetan lista
ne’e sera ke sesta bazíka ne’e iha tiha ona suku ne’ebé ami sujere ba estadu
atu bele karik labele hein kleur tanba ami iha situasaun ida oras ne’e ami mós
infrenta hela hamlaha”, Hateten Crispin
Gaio ba Naunil Media via telefone, sesta (21/05).
Nia hatutan, hanesan komunidade iha momentu ne’ebá dehan ami sira ne’ebé mak
simu ne’e sira dehan tuir lista ida uluk simu subsidiu ne’e no tuir ida ne’e,
ami infrenta hamlaha, dehan fali guvernu tenkeser la’o tuir fali ho lista ida subsidiu
entaun ne’e susar ba ami.
Hatan ba preokupasaun ne’e xefe suku Guruça Filomeno Mendonça hateten komunidade ne’ebé mak seidauk simu sesta bazíka parte autoridade sei halo fali karta reklamasaun ba iha munisípiu mak sei haruka ba iha ministeriu relevante.
“Klaramente ami sei esforsu an para bele familia uma kain 7 ho membru familia 23 pesoas ne’e ami sei buka buka mekanismu oinsá para perte CLN bele responde ba situasaun ne’e lá’os aldeia Lakulela de’it aldeia lima ne’e hotu”, Hateten xefe Suku Guruça Filomeno.
Ikus liu, nia dehan, suku Guruça Aldeia hamutuk 5 totál uma kain hamutuk 596, iha aldeia lima ne’e uma kain 27 mak tama iha lista reklamasaun, Tanba momentu iha orientasaun katak 27 uma kain naran seidauk hamutuk ho dadus ne’ebé agregadu família simu osan , entaun ida ne’e konsidera hanesan reklamasaun nafatin. *Jos