PM Taur : Posibilidade TL Bele Rejista Kazu Covid-19 Kada-Loron Rihun-1000

Naunil Media (Díli), Primeiru Ministru (PM) Taur Matan Ruak, Hateten Timor-Leste (TL) iha posiblidade atu bele aumenta kazu Covid-19 kada loron rihun 1000.

“Governu hala’o ona dilijénsia hirak ne’ebé presiza atu prepara ita-nia país ba senáriu aat liu, ne’ebé iha posibilidade iha tempu badak, sei bele hakat liu kazu foun infesaun loroloron nian hamutuk 1,000 (rihun ida) , hodi koloka Timor-Leste iha topu mundiál kona-ba kazu foun sira, hanesan ho Brazíl, Papua Nova Guiné no Índia”,Dehan Primeiru Ministru Taur Matan Ruak iha  diskursu kona-bá debate renovasaun estadu emerjénsia (EE) ba dala 14, iha Parlamentu Nasionál sesta (28/05).

Xefe governu da ualu konstituisional Taur Matan Ruak, hatutan karik senáriu ne’e mosu duni, tenke frontál no objetivu atu rekoñese katak Servisu Saúde Nasionál nian sei la preparadu atu hatán iha tempu útil ba kazu hotu-hotu, liuliu kona-ba atendimentu ba situasaun emerjénsia nian ka iha akompanhamentu no tratamentu ba kazu COVID-19 sira ne’ebé grave liu, ne’ebé tenke baixa iha unidade kuidadu intensivu nian.

“Ita-nia Servisu Saúde Nasionál, iha tempu badak, bele hasoru situasaun ida ne’ebé ho presaun bo’ot, tanba númeru kazu ne’ebé presiza asisténsia médiku ospitalár sa’e maka’as, no situasaun ne’e bele agrava mós risku moris nian ba sira ne’ebé iha nanis ona kondisaun ne’ebé bele halo Covid-19 dezenvolve-an ho forma ida-ne’ebé aat liu”. Dehan PM Taur Matan Ruak iha ninia diskursu iha debate renovasau EE.

Eis Prezidenti Repúblika ne’e dehan,  situasaun ida-ne’e sei sai dezafiu bo’ot ba demokrasia no instituisaun estadu sira nian, nune’e mós ba kapasidade prevensaun no reasaun iha faze resposta nian ne’ebé hahú ona.

Taur Matan Ruak haktui, maske iha kalohan nakukun ne’ebé taka orizonte husi futuru besik, labele husik lakon áhi esperansa no fó konfiansa ba ezekusaun ne’ebé lais husi Planu Nasionál Vasinasaun nian, ne’ebé la’o daudaun, hela iha ritmu ne’ebé di’ak, no  permite ona prosesu imunizasaun ba maluk sidadaun na’in 65,000.

Nia dehan, Vasina sira profilazia Covid-19 nian ne’ebé disponibiliza no fornese husi Sistema COVAX Nasoins Unidas nian no mós husi nasaun amigu sira Timor-Leste nian, hatudu jenerozidade no solidariedade internasionál ne’ebé Governu agradese, liuliu tamba sai nafatin hanesan dalan mesak de’it ne’ebé efikás no sustentavel hodi hakat liu no manán moras mortál ida-ne’e.

Nia parte husu lideransa nasionál, partidu polítiku sira, empreza no forsa viva sira ne’ebé halo parte iha Sosiedade Sivíl atu kontribui ba esforsu diseminasaun no sosializasaun informasaun kona-bá benefísiu sira husi vasina, ne’ebé bo’ot liu fali potensial risku hirak ne’ebé iha bainhira ita simu vasina.

Ikus liu, nia dehan vasinasaun jerál ba populasaun sai hanesan estratéjia ne’ebé di’ak liu atu asegura protesaun ba povu nia saúde no vida, no mós dalan ne’ebé lalais liu atu fila fali ba normalidade, rekupera fali ekonomia, no harii fali país, ho ánimu foun, determinasaun no empenhu. Tanba ne’e, xefe governu apela ba kompriensaun husi Exelénsia sira, Señora no Señór Deputadu sira, katak importante atu hamutuk no serbisu iha ekipa atu nune’e bele mobiliza povu hodi halakon Covid-19 iha país, hodi autoriza, ba efeitu ne’e, renovasaun ba da-14 (dasanulu-resin-haat) Períodu Estadu Emerjénsia nian.*Jos