Lere: Kadetes Foun Barak Lakoñese PR no PM
Naunil Media (Díli), Xefe Estadu Maior Jeneral das Falintil Forsa Defeza Timor-Leste F-FDTL Tenente General Lere Anan Timur, preokupa iha Kadetes Militar Foun, barak mak lahatene se mak Prezidente Repúblika no se mak Primeiru Ministru.
“Problema ida mak ne’e, ita nia joven sira ne’e balun foin mai husi Indonezia, foin mai husi Austrália no Portugal, balun lakonese Prezidenti Repúblika, la koñese Primeiru Ministru, la konese nia jeneral, ida ne’e problema bo’ot”, Dehan Xefe Estadu Maior Jeneral F-FDTL Tenente General Lere Anan Timur ba Jornalista sira hafoin sorumutuk ho Prezidenti Repúblika (PR) Francisco Guterres “Lú Olo” iha Palásiu Prezidenti Nicolau Lobato Bairru Pite, kuarta (09/06).
Tenente General ne’e mós preokupa Timor oan ho tinan 20 ital, mak la koñese Prezidenti Repúblika, Primeiru Ministru ne’e, hamosu konfuzaun.
“Ida ne’e bulak, no sira (ekipa selesaun) hakarak atu elemina kedas iha ne’e, maibé ha’u dehan laiha, ita labele fó sala de’it ba ita nia joven sira, fó sala mós ba ita nia ukun nain sira ne’e,” Hatete Lere.
Lere hatutan, edukasaun halo saida, nusa mak la hanorin, Prezidenti Repúblika no Primeiru Ministru sira ne’e mai husi ailaran, no nia mak ida ne’e, ida ne’e edukasaun, ne’e sidadania ida ne’e tenke iha, ida ne’e laiha ema la koñese, ida ne’e moe.
Nia dehan, haree ba situasaun ne’e bele sala maibé ne’e hanesan lisaun ba Timor oan hotu, liu-liu edukasaun hodi haree ba ida ne’e.
“Joven sira ne’e iha foho ne’ebá ne’e hein bibi, ou karau, laiha televizaun tan, entaun la koñese, dala ida ha’u ba ho prezidente uluk maun Ramos Horta ba Daudere, ba eskola ida estudante kuaze atus ida resin, katuas husu se mak Prezidenti Repúblika, Anito Matos mak prezidenti”, Konta tuir Lere.
Maibé, nia dehan iha buat barak mak sei haree iha prosesu selesaun, maibé kuandu saúde ladi;ak, sei lakon. *Jos
