MAP ho Autoridade Manufahi kuda Fore-Mungu Hektare 20
Naunil Media (Manufahi), Diretór Agrikultura munisípiu Manufahi Aurelio dos Santos Marques, Informa Ministériu Agrikultura no peska (MAP) hamutuk ho autoridade munisípiu Manufahi horsehik lansa kuda fore-mungu hektares rua nulu (20) iha suku Betano postu admnistrativu Same Munisipiu Manufahi.
“Programa produz la-kolen kuda fore-mungu ne’e halo lansamentu iha Betano, maibé programa ne’e realiza iha postu adminstrativu Same, Alas no Fatuberliu, MAP serbisu hamutuk entre Peskiza Nasionál no sentru Betano no apoiu husi ajénsia internasionál Ai-Com hodi hasa’e produsaun fore-mungu liu husi programa prodúz la-kolen ne’e hodi hadia ekonómia to’os na’in sira , nomós atu halo rotasaun kuda ai-horis ho intensaun atu habokur hikas fali rai ne’ebé to’os na’in sira uza durante ne’e kuda ai-horis sira seluk hanesan batar, hare no ai-horis seluk tan ne’ebé halo mihis ona rai nia bokur”, Dehan Aurelio Ba Jornalista iha suku Betanu postu Administrativu Same munisípiu Manufahi foin lalais ne’e.
Nia hatutan, programa prodúz la-kolen ne’e la halo kolen to’os na’in no natar na’in sira tanba la presisa ona fila tan rai, maibé lere de’it du’ut no rega ho ai-moruk pestisida bele kuda ona fore-mungu ho fore keli, no tinan ida bele kuda dala 2 to’os dala tolu ba ai-horis iha natar no to’os.
Diretór Tékniku Ai-Com Robert Williams haktuir rezultadu peskiza ne’ebé durante ne’e halo, hatudu katak Komunidade barak maka la pronto atu halo rotasaun kuda fore-mungu iha sira nia natar tanba la iha kbi’it tanba kolen, hafoin koelta sira nia háre, maibé liu husi programa prodúz la-kolen ne’e atu motiva to’os na’in sira hodi utiliza sira nia natar hodi produz produsaun agríkula iha tinan ida dala rua, nune’e mós liu husi rotasaun kuda fore-mungu no fore-keli bele ajuda habokur hikas rai nia bokur, Dehan nia.
Administrador Munsipiu Manufahi Arantes Izaac Sarmento, agradese ba MAP liu husi Peskiza Nasional no Ajensia Internasionál Ai-Com implementa ona Programa Produs La-Kolen Ba povoagrikultór sira iha Betano hodi hadia ekonómia povo nia liu husi produsaun agríkula.
Entertantu iha Lansamentu Ne’e MAP Distribui mós fini fore-mungu, aimoruk rega du’ut no tanki regadór ba povo agrikultór sira. NFM
