Postu Saúde Tolu iha Manufahi La-Realiza Vasina,Tanba AstraZeneca Hotu

Naunil Media (Manufahi), Responsável programa imunízasaun saúde munisípiu Manufahi, Domingos Taváres, Informa   Prosesu vasínasaun AstraZeneca faze daruak iha sentru Saúde tolu (3) iha munisípiu Manufahi ohin la realiza, tanba aimoruk Vasínasaun AstraZeneca hotu.

“Aimoruk vasínasaun la to’o, tanba maiória komunidade sira antuzíasmu tebes partisípa hodi hetan vasínasaun AstraZeneca ba doze daruak no doze dahuluk,  ho situasaun ne’e sentrú saúde tolu (3) hanesan Alas, Fatuberliu no Same Tersa-feira ohin la realiza ona vasínasaun, no postu sentru saúde Turiscai mak  kontínua realiza vasínasaun ba komunidade sira, maibé  aban sei la kontinua ona vasínasaun tanba aimoruk vasínasaun hotu”, dehan Responsável programa imunízasaun saúde munisípiu Manufahi, Domingos Taváres ba Jornalista iha nia kna’ar fatin Nularan postu Administrativu Same munisípiu Manufahi, tersa (29/06).

Nia haktuir, Maske nune’e servísu  saúde munisípiu Manufahi halo ona pedidu  ba ministériu Saúde, no tuir informasaun husi ministériu Saúde katak, vasínasaun AstraZeneca sei to’o ona iha Díli, iha loron 30 fulan-Juñu kuarta-feira aban, no sei distribui ba munisípiu sira nune’e bele kontínua hikas halo vasínasaun ba komunidade sira.

“Husi total enúmerasaun tarjetu vasínasaun ba populasaun munisípiu Manufahi hamutuk ema na’in 11.201, no iha prosesu vasínasaun faze daruak iha Manufahi ne’ebé realiza hahú loron 11 fulan Juñu to’o loron 26 fulan-Juñu sabádu fin semana, sidadaun hamutuk ema na’in 5.825  maka hetan vasínasaun AstraZeneca kompostu vasínasaun doze dahaluk ema na’in 5.198 no dóse daruak ema na’in 627.”, katak nia.

Nia dehan, prosesu vasínasaun AstraZeneca ba faze dahuluk iha munisípiu  Manufahi,  komunidade sira la dún partípa, tanba tauk ho rumóris oin-oin, maibé  iha faze daruak nian, maiória komunidade sira antuzíasmu maibé aimoruk vasínasaun mak  hotu sedu, nia hakotu. NFM