Traballador Sira La Lakon Direitu Ba Suplementu Remuneratóriu

Naunil Média (Díli), Iha 2 juñu 2021, Konsellu Ministrus aprova Dekretu-Lei   ida  tan kona-bá  suplementu remuneratóriu ba funsionáriu públiku sira, ajentes no traballadores  administrasaun públika ne’ebé hala’o sira-nia atividade profisionál iha servisus prevensaun ka kontrola Covid-19 ka iha kondisaun bele hetan  vírus SARS-Cov2.

Liu husi Komunikadu ne’ebé mak Naunil Média asesu iha média Prezidensiál Repúblika iha sesta (02/072021) hateten traballador sira la lakon direitu ba Suplementu Remuneratoriu.

Tuir Konstituisaun haruka,  Governu haruka diploma ne’e  mai Prezidenti Repúblika tetu. Maibé molok Dekretu-Lei foun ne’e tama,  Governu, liuhusi atu lejislativu balun, fó tiha ona direitu ba suplementu remuneratóriu  hodi rekompensa  traballador sira ne’ebé servisu ho risku  hetan moras Covid-19.  Direitu ne’e hahú iha fulan 28 marsu 2020.

Tanba moras Covid-19, direitu ba suplementu remuneratóriu ne’e regula ho Dekretu- Lei 17/2020 , hahú  iha 28 marsu 2020.  Dekretu-Lei ne’e  iha regra espesifiku ba de’it tempu Covid-19 no tanba ne’e konta ho finansiamentu husi Fundu Covid-19.

Dekretu- Lei   ne’e la define prazu bainhira mak  direitu espesífiku ne’e hotu. Iha 12 maiu 2020, Governu aprova Rezolusaun ho regras oioin, inklui simu pagamentu suplementu remuneratóriu,  fulan-fulan tuir kategoria ida-idak nian, valor ba loron servisu halo tiha ona no sá atividade mak ida-idak halo, ho efeitu husi loron  28 fulan Marsu 2020.  Iha Setembru mosu Dekretu-Lei foun ne’ebé altera ida uluk kona-ba suplementu remuneratóriu maibé la hatete bainhira mak direitu ne’e hotu.

Husi fulan  marsu tinan  2020, Governu selu de’it suplementu remuneratóriu ba fulan rua:  Abril no Maiu tinan 2020, guvernu justifika katak suspende pagamentu ba suplementu remuneratóriu tanba iha fulan Juñu tinan 2020, la iha Estadu Emerjénsia.

Biar Estadu Emerjénsia la iha loron 40,  husi   27 Juñu to’o 5 Agostu tinan 2020,  risku atu hetan moras Covid-19 kontinua iha períodu ne’e to’o ohin loron. Nune’e, traballador sira ne’ebé rejista sira nia tempu servisu to’o ohinloron, labele lakon sira-nia direitu ba suplementu remuneratóriu.

Ho Dekretu-Lei  ikusliu kona-ba suplementu remuneratóriu, karik Prezidente Repúblika promulga, Governu atu selu de’it suplementu remuneratóriu ba traballadór sira,  husi Abril 2021  to’o Dezembru 2021.

Maibé Prezidenti Repúblika veta Dekretu-Lei foun ne’e. Ida ne’e la signifika katak traballadór sira lakon sira-nia direitu ba suplementu remuneratóriu ba servisu ne’ebé halo tiha ona.

Governu sei bele uza nafatin Dekretu-Lei ida uluk, númeru  17/2020, altera iha Setembru 2020, no rezolusaun ne’ebé Governu rasik aprova tiha ona,  hodi halo nafatin pagamentu ba traballador sira ne’ebé rejista sira-nia tempu servisu iha Liña da Frente. 

Governu bele mós halo medida foun atu regulamenta oinsá  selu direitu traballador sira-nian ba suplementu remuneratóriu ba kotuk no ajusta pagamentu sira ne’ebé prevé iha orsamentu.

Se Ministériu Finansas la tau osan natoon iha orsamentu tinan ida ne’e, Governu bele hetan dalan seluk atu nune’e  traballadór sira labele lakon sira-nia direitu.  

Haree ba Konstituisaun, lei no regulamentu hotu-hotu ne’ebé iha relasaun ho diploma ne’e, mak Prezidenti Repúblika deside veta politikamente  no haruka fila ba Governu hodi hadi’ak no hato’o fali seluk ida, ne’ebé hatuur prazu maibé tanen nafatin direitu traballadór sira-nian. *Jos