GeralIkus LiuNewsSaude

PR Lú Olo Dekreta EE Ba Da-15, Bandu Sirkulasaun Internasional Inklúi Nasional

Fahe Tutan

Naunil Media (Dili) Loron 2 fulan Jullu, tinan 2021, Prezidente Repúblika, (PR) Francisco Guterres Lú Olo, liuhusi Dekretu Prezidente Repúblika númeru 39/2021, 30 juñu, dekreta estadu emerjénsia ba dasanuluk-resin-lima ba loron tolu-nulu (30), hahú husi tuku 00.00 iha 2 jullu 2021 (sesta-feira) no termina iha tuku 23.59 iha 31 jullu 2021 (sábadu).

Haree ba númeru kazu Covid-19 ne’ebé aumenta Estadu kontinua foti medidas prevensaun no kombate kontájiu virus SAR-CoV-2. Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.

Timor-Leste rejista liu atus-ualo (800) kazu ativu konfirmadu, ho total númeru akumuladu liu rihun-sia (9000) desde inísiu kazu dahuluk rejistadu iha marsu 2020. Virus corona hamate ona ema hamutuk na’in-24 asosiadu ho ho Covid-19 iha territóriu nasionál tomak.

Prezidente Repúblika dekreta estadu emerjénsia hafoin pedidu estensaun aprova iha Parlamentu Nasionál. Molok ne’e, Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál estensaun estadu emerjénsia ba dala-15 nu’udar dalan atu proteje saúde públika.

Deklarasaun estadu emerjénsia sei abranje territóriu nasionál tomak.

Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasoins, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada.

Autoridades públikas kompetentes sei impoin medidas importante hodi prevene importasaun estirpes foun SARS-CoV-2 ba territóriu nasionál no permite kontensaun no nia alastramentu entre populasaun liuhusi dalan taka fronteiras, bandu estranjeiru sira mai territóriu nasionál, estabelesimentu regras distansiamentu sosial, impozisaun ba obrigasaun halo teste, izolamentu ba pasiente infetadu, konfinamentu domisiliáriu no determinasaun serkas sanitárias.

Governu mak define medidas implementasaun ba estadu emerjénsia ba sanuluk-resin-lima.

Desde fulan marsu 2020, hafoin rejista kazu konfirmadu ida ho SARS CoV-2, Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hases sidadaun hotu-hotu husi kalamidade públika ne’ebé bele mosu husi moras Covid-19.* jos

Leave a Reply

Your email address will not be published. Required fields are marked *