FEATUREDIkus LiuNewsPolitika

PR “Lú Olo” Nomeia Membru CNE

Fahe Tutan

Naunil Média (Díli), Prezidenti Repúblika (PR)  Francisco Guterres “Lú Olo”, liu husi Dekretu Prezidenti Repúblika númeru 41/2021, 1 jullu,  nomea Olávio da Costa Monteiro de Almeida nu’udar membru efetivu no Detaviana Madalena Guterres Freitas nu’udar membru suplente ba Comissão Nacional de Eleições (CNE).

Liu husi Komunikadu ne’ebé mak Naunil Média asesu iha média Prezidensiál Repúblika, Sabadu 03/07/2021 katak Prezidenti Repúblika (PR) Francisco Guterres “Lú Olo” nomeia membru Comissão Nacional de Eleições (CNE).

Knaar CNE mak superviziona atus eleitorais ba orgauns soberania ho baze eletiva, orgauns reprezentativus poder lokal, orgauns suku no refendu.

Comissão Nacional de Eleições kompostu husi membrus designadus husi orgauns soberania, husi Ministériu Públiku, Defensoria Públika, konfisoins relijiozas no organizasoins reprezentativa husi feto.

Tuir alínea a) husi númeru 1 no númeru 2 husi artigu 5 husi Lei númeru 5/2006, 28 dezembru iha redasaun husi Lei númeru 7/2016, 8 juñu, Prezidenti Repúblika nomea membru na’in-ida ba Comissão Nacional de Eleições no suplente na’in-ida.

Membru Comissão Nacional de Eleições nomeadu ba mandatu tinan-lima, renovável ba dala ida de’it, mantein nia funsoins to’o pose membrus foun.

Mandatu ba atuál Prezidenti no membrus Comissão Nacional de Eleições sei termina iha 16 Agostu 2021,  tanba ne’e nesáriu ba Prezidenti Repúblika atu nomea membrus designadus ba orgaun ida ne’e. *Jos

Leave a Reply

Your email address will not be published. Required fields are marked *