Abrão TL Partisipa Jogu Olimpic Hanesan Obrigasaun Estadu Ida

Naunil Média (Díli), Sekretáriu Estadu Juventude no Desportu (SEJD sigla portugés), Abrão Saldanha  hateten desizaun Timor-Leste (TL) partisipa iha jogu Olimpic ne’e hanesan obrigasaun ida husi estadu membru ba komité Olimpic Internasionál.

“Ita nia desizaun atu ba partisipa iha jogu Olimpic ne’e hanesan obrigasaun ida husi estadu membru ba komité Olimpic Internasionál, nune’e mós liuliu hatudu ita mesmu iha difikuldade oioin iha pandemia no iha dezastre naturais, maibé ita hanesan povu ita iha esperansa ita hatudu ita nia eszistensia ita nia rezilensia iha situasaun difisil no bele konvive ho rai hotu-hotu ba iha jogu Olimpic ho dimensaun mundiál”, Dehan Sekretáriu Estadu Juventude no Desportu (SEJD) Abrão Saldanha ba Jornalista sira hafoin despedida ho atleta sira iha palásiu Prezidenti Nicolau Lobato Bairru Pite, Sexta (09/07).

SEJD hatutan, Timor-Leste (TL) nia delegasaun iha atleta nain tolu iha modalidade rua atletizmu ne’ebé reprezenta husi atleta Felizberto de Deus ne’ebé sei ba halai 1.500 metro, iha modalidade natasaun reprezenta Imelda Felicyta Ximenes no atleta José João Viegas ne’ebé sei ba nani metro 50 ho ida-idak iha nia kategoria tantu feto no mane.

Sekretáriu estadu ne’e hateten, esperansa ne’ebé guvernu no estadu Timor-Leste (TL) iha mak atleta sira presiza hatudu jogu di’ak, no manán ka lakon ne’e kestaun ikus importante mak reprezenta nasaun nia dignidade.

“Ita nia esperansa mak atleta sira reprezenta ita di’ak liu no hatudu jogu ne’ebé di’ak ho dignidade no integridade manan lakon ne’e kestaun ikus maibé importante reprezentasaun ho dignidade ho integridade”, Tenik sekretáriu estadu

Abrão esplika orsamentu ne’ebé apoiu ba partisipasaun ne’e 40 ital mill despeza bo’ot liu, ne’ebé mak halo ba partisipasaun ne’e mak iha viajen tanba agora dadauk laiha Voo komersiáis no ida ne’e halo kustu viajen sai karun liu.

 Nia afirma Kona-bá Corona Variante foun ne’ebé oras komesa daet tan ona ba nasaun barak SEJD, ne’e hatan atleta sira ne’ebé atu ba partisipa ne’e tuir protokolu ne’ebé rigor no husi nasaun uma nain ba jogu ne’e mak sei organiza.

 “Viajen iha protokolu rigor tebes organizadora husi uma nain Japaun atleta sira atu ba partisipa primeiru, sira tenke simu Vasina segundu doze ona segundu tenke PCR halo darlarua halo 96 oras antes kuandu sira negativu iha tan 72 oras ne’ebé delegasaun ne’e halo PCR dalaruma bainhira kuandu konfirmadu negativu ona mak sira ba iha ne’ebá”, Nia afirma

Mensajen ne’ebé SEJD  husu ba kontizente katak atleta sira reprezenta Timor-Leste (TL) ho di’ak, atu hatudu nu’udar povu no Nasaun hatudu determinasaun no orgullu nu’udar povu ida importante tebes mak Bandeira, no kontizente partisipa iha jogu ida ne’e hatudu katak Timor-Leste (TL) iha povu ida ho nia identidade rasik.

Nune’e mós atleta husi natasaun Imelda Felecyta Ximenes hateten Sira nia preparasaun ba Jogus Olimpikus ne’e ho kondisaun ne’ebé Timor-Leste (TL) iha.

“Ami prepara tuir kondisaun Timor-Leste (TL) nian ne’ebé iha, mas difikuldade barak mak ami infrenta mas ami nafatin espiritu bo’ot hodi prepara diak liu tan ba partisipa jogu Olimpic, no fizikamente ami prontu atu ba partisipa, difikuldade ne’ebée mak ami infrenta mak hanesan infrastruktura hanesan ita hotu haree pisina dalan ne’ebé halai ne’e presiza kampu rasik no ami prepara tuir kondisaun ne’ebé mak iha” katak nia

Tuir planu jogu refere sei hahú iha 23 Jullu 2021 nia abertura no sei termina iha dia 8 Agostu kontizente Timor-Leste (TL) preve atu fila fali dia 4 Agostu 2021. *Jos