PR Ható Saudasoens ba Atleta TL Na’in 3 Kompete Iha Japaun

Naunil Média (Díli), Prezidenti da Repúblika Francisco Guterres (PR) “Lú Olo” Ható saudasoens ba atleta    timor oan na’in 3 ne’ebé sei partisipa iha Jogus Olimpikus ne’ebé kompostu husi nasaun 206 iha Tokiu

“Ho laran-ksolok bo’ot tebes mak ha’u saúda maluk sira mai serimónia despedida ba ita-nia Atleta sira ne’ebé sei partisipa iha Jogus Olímpikus, ne’ebé sei realiza husi  23 Jullu tó 8 Agostu,  iha Tókiu, Japaun. Atleta  husi nasaun atus rua resin neen (206), mak sei kompete iha modalidade ha’a tnulu-resin-neen (46).  Timor-Leste (TL) sei partisipa ho atleta na’in-rua iha modalidade natasaun no nain-ida iha atletizmu.” Dehan Prezidenti da Repúblika (PR) Francisco Guterres “Lú Olo” liu husi diskursu bainhira halo despedida ho atleta sira iha palásiu Prezidente Nicolau Lobato Bairru Pite, Sexta (09/07).

Aman ba nasaun ne’e hateten iha tinan 2000, Timor-Leste (TL) partisipa ba dahuluk iha Jogus Olímpikus akontese iha Sydney, Austrália, no daruak iha Jogus Olímpikus 2016,  iha Rio de Janeiro, Brazil.

“Ha’u hakarak hato’o ha’u-nia agradesimentu espesiál tebes ba apoiu tomak husi  Japaun, liu husi embaizada Japaun iha Timor-Leste, hodi asegura ita-nia atleta sira-nia partisipasaun iha eventu ida-ne’e. La haluha mós temi apoiu murak tebes husi  ita-nia belun Embaixadór Kitahara no mós husi Ina City ne’ebé sei garante  akomodasaun no dezlokasaun ba ita-nia atleta sira durante Jogus Olímpikus, iha Tókiu. Obrigadu barak!”,  Hateten aman ba nasaun.

Xefe estadu Haktuir Fundadór Komité Olímpiku Internasionál, baraun fransés Pierre Coubertain, ho motivasaun katak bele mós eduka ema, liu hosi desportu, haree ba eventu ida hanesan Jogus Olímpikus, nu’udar instrumentu ida atu povu sira hakbesik-an ba malu hodi hametin dame  Timor-Leste (TL) no Japaun sai hanesan ezemplu di’ak ida kona-bá oinsá povu rua hakbesik-an ba malu.

“Ba doben atleta sira, Imelda Felicyta Ximenes Belo, Felisberto de Deus no José João Viegas da Silva, ha’u hakarak fó parabéns ba imi ida-idak  no dezeja susesu wain ba imi-nia partisipasaun iha Jogus Olímpikus ida ne’e. Foin ba dahuluk mak Timor-Leste partisipa iha modalidade natasaun ho nani-na’in 2,  Imelda Felicyta Ximenes hosi munisípiu Baucau no José João Viegas da Silva hosi Munisipiu Ermera.   Atleta Felisberto de Deus, hosi munisípiu Ermera, sei kompete iha modalidade atletizmu. ” dehan Xefe estadu

“Lú Olo” hatutan Atleta nain tolu sei Reprezenta Timor-Leste (TL) no sei kompete ho nasaun barak no knaar ida ne’e móss laos fasil.

” Ita-Boot sira sei reprezenta  ita-nia rain doben Timor-Leste (TL) no  sei kompete ho atleta sira seluk hosi rain oioin. Knaar ida ne’e la’ós fasil ba Ita-Boot sira. Prezidente Repúblika enkoraja ita-bo’ot sira atu haktuir ita-nia bei’ala sira. Katak sei kompete ho aten-barani no neon-metin! Ho forsa vontade maka’as, determinasaun no persisténsia” katak “Lú Olo”.

Nia hatutan sira-nia partisipasaun iha Jogus Olímpikus iha Tókiu fó ona orgullu no onra boot ida ba nasaunTimor-Leste (TL) .

“Prezidenti  da Repúblika (PR) hein katak ita-bo’ot sira bele hatudu ba mundu katak, nasaun  ki’ik  ida hanesan ita-nian,  bele mós kompete iha nível internasionál. Karik Ita-boot sira manán medalla ruma, sei fó onra boot liután ba Timor-Leste (TL) Maibé, tuir Pierre Coubertain hatete “Importante liu la’ós manán, maibé compete ho dignidade!,” Hakotu nia.

Nune’e mós atleta Imelda Felecita Ximenes hateten sira nia preparasaun ba Jogus Olimpikus ne’e ho kondisaun ne’ebé Timor-Leste (TL) Iha.

“Ami prepara tuir kondisaun Timor-Leste (TL) nian ne’ebé iha, mas difikuldade barak mak ami infrenta mas ami nafatin espiritu boot hodi prepara di’ak liu tan ba partisipa jogus Olimpikus, no fizikamente ami prontu atu ba partisipa, difikuldade ne’ebé mak ami infrenta mak hanesan infrastruktura hanesan ita hotu haree pisina dalan ne’ebé halai ne’e presiza kampu rasik no ami prepara tuir kondisaun ne’ebé mak iha”, Katak nia

Nia hatutan Mensajen Prezidneti ba sira katak lakon karik lakon ho dignidade , no sira kompete karik tenke ho dignidade.*Jos