OPMT ho CPEHMT, Fahe Sertifikadu ba Hakerek Na’in ba Livru-Buibere

Naunil Média (Díli), Organização Popular da Mulher Timor (OPMT) no Comissão de Pesquisa e Elaboração da Historia da Mulher Timor (CPEHMT) fahe sertifikadu ba peskizador no hakerek na’in ba  livru Buibere Hamri’ik Ukun Rasik Aan.

“Tanba ne’e mak ohin kompleta fulan ida 10 Jullu ami komisaun hanoin para atu hala’o fila fali serimónia ida ne’e, serimónia ida ne’e nia objetivu atu fó agradesementu ba maluk peskizadores hakerek na’in sira, kontribui no maluk pontus vokais sira ne’ebé mak durante ne’e fó sira nia apoiu tomak ba hakerek livru ida ne’e”, Dehan Sekretaáriu Jerál interina  Organização Popular da Mulher Timor (OPMT) Florentina Smith ba jornalista sira hafoin remata fahe sertifikadu iha Salaun Centru Nasionál Chega Balide, Sabadu (10/07).

Sekretáriu Jerál Interina OPMT ne’e hatutan, hanesan  kontempla mós iha livru ida ne’e lori tempu ida ne’e ke difisil i naruk tebes, no mós laespera katak feto Timor sira bele hanesan joven feto ho mane ne’ebé mak sira halo rekrutamentu selesiona ema hamutuk ema nain 20 ne’ebé mak bele konsege halo intervista ba ema na’in 800, istória ida ne’ebé kontempla vida feto nia moris hahú desde iha  koloniál tó mai iha  moris loron-loron nian.

Florentina haktuir, feto nia partisipasaun iha tinan 1974, feto nia partisipasaun iha baze de apoiu feto oinsa bele iha polítika, feto oinsa servi povu servi nasaun ho di’ak liu, ne’ebé istória badak husi kapitulu 13 ne’ebé mak sira hanesan jerasaun OPMT nian.

“Jerasaun 1974 hakarak husik hela memoria ida atu nune’e joven sira, ba maluk sira ne’ebé mak lé livru ne’e karik bele hatene istória tomak ne’ebé feto ninia kontribuisaun ba luta ba independensia nasionál”, Katak nia.

Tuir Sekretariu Jerál interina OPMT ne’e nia haree  katak Partisipasaun feto iha vida polítika, iha dezenvolvimentu ne’e naton embora sira sei iha nafatin responsabilidade atu hatutan habelar istória feto mak hahú ho livru ida ne’e.

Iha fatin hanesan deputada Josefa  Pereira Alvares Soares, Hateten kontribuisaun feto nia nia luta sai hanesan referensia bo’ot ba peskizador sira, bele hakerek livru ida ne’e importante atu rai hela ba jerasaun foun sira.

“Kontribuisaun ami nia ba luta ne’e sai hanesan referensia bo’ot ba peskizador  sira,  ne’ebé eskritoriu halo livru ida bele sai hanesan livru importante atu rai hela ba jerasaun foun sira, ne’ebé mai atu koñese istória ne’e katak laos mane de’it mak luta ba rai ida ne’e, maibé feto sira mós luta” Hatete Deputada Josefa Pereirra Alvares Soares

Deputada ne’e hatutan, iha buat barak ne’ebé presiza atu haree hodi tau iha livru, ne’e laos de’it sira ne’ebé mak mate no kaer kilat, maibé tenke hatene mós katak iha Buibere barak ne’ebé nia kaben inimigu oho tiha, no sira tenke halo papél hanesan inan no aman dala ida, no ida ne’e susar ba sira atu haree ba sira nia moris no oan sira nia moris.

“Ida ne’e ema barak tebes mak seidauk inklui iha laran no livru ne’e, no mós ha’u seidauk lé maibé ha’u hatene katak sira inklui feto sira nia partisipasaun ba luta ne’e, iha Frente tolu ne’e no aspektu hotu iha area hotu”, katak nia.

Tuir komvite ne’ebé iha ema hamutuk atus ida resin mak atu simu sertifikadu,  maibé tanba ohin balun la mai entaun sira ne’ebé mak la mai ne’e komisaun sei rejista hela, no komisaun sei lori tempu badak ható ba sira idak-idak, sira bele simu sira nia sertifikadu ho livru ne’ebé mak komisaun prepara ona, Dehan nia.

Nune’e mós orsamentu ne’ebé hahú harii komisaun iha 2010 depois de 2010, sira halo reuniaun tur hamutuk konsege hatama proposta ba iha guvernu ba mós entidades sira seluk kontribuites sira valor totál orsamentu ne’ebé mak sira konsege rekolla hamutuk rihun $ 544.544, relatoriu sira ne’e ható dadauk ona i falta de’it relatoriu ikus mak ida lansanmentu livru nian mak fulan kotuk 10 Juñu i kontinua tan ba ohin serimónia agradesementu ne’e, Hateten nia

Livru Buibere Hamri’ik Ukun Rasik Aan ne’e halo ona lansanmentu husi Prezidente da Repúblika Francisco Guterres “Lú Olo” loron 10 Juñu iha palásiu Prezidente Nicolau Lobato Bairru Pite, no livru ne’e mai husi inisiativa Organização Popular da Mulher Timor (OPMT), nu’udar Organizasaun massa FRETILIN nian no livru refere reflete ba feto hotu-hotu nia kontribuisaun.*Jos