FEATUREDIkus LiuNewsSaude

Delta labele Tama TL MS husu Nafatin Tau Atensaun Fronteira

Fahe Tutan

Naunil Média (Díli), Prevene Moras Variante Foun Delta labele tama Timor-Leste (TL), Ministra Saúde (MS) Odete Maria Freitas Belo husu tau atensaun nafatin ba Fronteira nune’e ema ilegal labele tama sai.

Ministra Saúde (MS) Odete Maria Freitas Belo ható kestaun ne’e ba jornalista hafoin sorumutuk ho Prezidenti Repúblika (PR) Francisco Guterres “Lú Olo” iha palásiu Prezidenti  Bairru Pite, segunda (12/07).

“Primeiru hanoin ita tau nafatin atensaun ba iha ita nia fronteira sira ema labele tama illegal, depois ita nia Portu, Airoportu ita nafatin fó flexibilidade katak sé bele tama bainhira  ho vasina dala rua ona sira bele tama, maibé sira lapresiza halo karantina, maibé situasaun sira hanesan ne’e bele muda tuir dezenvolvimentu Covid-19 ne’e rasik”,  Hatete Ministra Saúde Odete Maria Freitas Belo.

Ministra hatutan, prevene moras ne’e labele tama mai rai laran, la’ós governu mesak maibé ema hotu-hotu nia responsabilidade.

“Iha parte seluk nafatin la’ós governu de’it mak resposabiliza kona-bá oinsá atu prevene Covid-19, tama iha ita nia rai ou  bele hada’et entre ita, maibé ita hotu-hotu ninia obrigasaun se karik Covid-19 ne’e mak eziste duni, ita hotu-hotu nafatin katak prevensaun ba Variante foun ne’ebé mak ita bo’ot sira koalia ne’e ladiferente nafatin uza maskara, fase liman, prevene aglomerasaun nafatin distansia sosial”, Katak nia.

Nia hateten , ema hotu atu bele simu vasina nune’e bele hasa’e imunidade hodi kontra moras ne’e.

“No ikus liu mak ita hotu-hotu se bele iha konsensia para atu ba simu vasina ne’e, sei forti liu tan hasoru moras Covid-19, ne’ebé mak sei mai ho nia Variante sira “,  Katak nia.

Nia dehan, Nune’e Karik Delta mosu iha Timor-Leste ekipamentu sira sei garante kalae Ministra hateten Sira la preparadu.

“Hanesan ha’u dehan ita lapreparadu, ita prepara tó tiha ne’ebé, maibé ita nia situasaun ita nia sistema saúde ami koko atu prepara, maibé sistema saúde nafatin, tanba ne’e mak ita sempre husu atu halo prevensaun uza maskara”, Nia deklara.

Nia hatutan, labele espera situasaun ne’ebé mak ladi’ak, governu sempre optimismu katak situasaun aat sei la akontese iha rai laran, ho ema hotu-hotu nia koopersaun no hotu-hotu nia kontribuisaun ba rai ida ne’e, atu labele mate labele moras ba toba iha hospital ne’ebé mak sei fraku tebe-tebes. *Jos

Leave a Reply

Your email address will not be published. Required fields are marked *