PR “Lú Olo” Fó Posse Ba Embaizadór Foun Sira

Naunil Média (Díli) Prezidenti Repúblika (PR) Francisco Guterres “Lú Olo”,  Fó posse ba embaizadór foun Timor-Leste (TL), Carlito Nunes ba postu ho karáter multilaterál iha Misaun Permanente Organizasaun Nasoins Unidas, Eusebio Corsino ba postu ho karáter bilaterál iha Repúblika Cuba, Abel Guterres ba Estadu Brunei Darussalam,  Felicidade Guterres ba Nova Zelândia, no Adão Soares Barbosa ba Enviadu Espesiál, ho  kategoria  Embaizadór Itinerante ba Asuntus Klimátikus.

Iha tomada-de posse ne’e Prezidenti Repúblika (PR) liu husi diskursu iha palásiu Prezidenti  Nicolau Lobato Bairru Pite, Tersa 13/07/2021, Hateten nia ho laran haksolok tebes mak ohin fó posse ba embaizadór foun Timor-Leste (TL) hodi ba hala’o sira nia misaun iha nasaun sira ne’ebé mak simu akreditasaun.

“Ho haksolok bo’ot tebes mak ha’u  prezide serimónia tomada-de posse Exelénsia sira-nian, nu’udar embaizadór foun Timor-Leste (TL), ba postu ho karáter multilaterál iha Misaun Permanente Organizasaun Nasoins Unidas, ba postu ho karáter bilaterál iha Repúblika Cuba, Estadu Brunei Darussalam, Nova Zelândia no mós ba Enviadu Espesial, ho kategoria Embaixador Itinerante ba Asuntus Klimátikus”.dehan Prezidente Repúblika”, Dehan aman nasaun.

PR “ Lú olo” hatutan, nomeasaun ida ne’e signifika katak Governu no Prezidenti Repúblika (PR) fó fiar ba bo’ot sira atu servisu hamutuk ho País no organizasaun sira, ne’ebé sira simu akreditasaun ba no nune’e, relasaun bilaterál no multilaterál entre estadu Timor-Leste (TL) no estadu sira seluk sei hametin liután.

Tuir artigu 6 Konstitituisaun Repúblika Demokrátika Timor-Leste (KRDTL) hatete katak, entre hakarak seluk, objetivu prinsipal, mak promove harí no haburas relasaun amizade no kooperasaun entre estadu hotu-hotu, no xefe estadu fiar katak sira iha kondisaun atu hasa’e no haluan liután nível no ámbitu kooperasaun ida ne’e. Dehan nia.

Iha fatin hanesan vise Ministru Negósiu Estranjeiru no Kooperasaun (MNEK) Julião da Silva, hateten servisu misaun iha nasaun lubuk ida mak kuaze remata ona maibé ho pandemia global inklui Timor-Leste (TL) estadu emerjensia ne’e mós prejudika sira nia viajen.

“Hanesan ita bo’ot sira hatene serbisu xefe misaun sira iha nasaun lubuk ida mak sira nia misaun kuaze remata ona balun remata ona tinan, balun remata ona 6 messes, ita boot sira hatene mundu imfrenta hela situasaun global pandemia inklui ita nia nasaun Timor-Leste (TL) estadu emerjensia entaun perjudika sira nia viajen husi sira nia fatin serbisu mai tanba ne’e mak ita estende sira nia mandatu”, Dehan Vice MNEK

Julião hatutan nasaun  balun mós loke ona Voo Viajen Aviaun, tanba ne’e mak Prezidenti Repúblika (PR) hahu fó posse ba embaizadór no Embaizadóra sira ohin hahu nain 5 no tuir tan mai sei posse tan enbaizadór nain sanulu resin tempu badak sei simu tan posse.

Nune’e mós Felicidade Guterres nu’udar enbaizadóra ne’ebé designada iha Nova Zelândia sente agredesida tebes tanba bele hetan konfiansa hodi asumi knaar nu’udar enbaizadóra ba dala rua.

“Ha’u Embaizadóra ne’ebé designada ba iha Nova Zelándia, ha’u sente agredesida tebes, tanba bele hetan konfiansa atu asumi knaar hanesan enbaizadóra agora ba dala rua, tanba uluk ha’u iha Kamboja ha’u fila fali mai tinan ida ho balun ona i agora ha’u asumi fali knaar hanesan enbaixadora ba dala rua”, Katak Enbaizadóra Felicidade Guterres.

Enbaizadóra foun ne’e mós sente agradese tebes tanba bele hetan komfiansa husi Presidenti Repúblika (PR), Guvernu no Ministeriu Negósiu Estranjeiru Kooperasaun (MNEK) hodi nia asumi knaar ba dala rua.

Tuir Felicidade Nova Zelándia país ida ne’ebé ke importante tebes ba Timor-Leste (TL) ne’ebé mós kontribui ona ba Timor liu-liu iha 1999 kontribui iha area Defeza no mós ba polísia, nune’e mós iha Covid-19 nia laran ne’e sira mós fó apoiu ba estudantes sira ne’ebé mai husi China, ne’ebé mak atu mai ladiak Nova Zelándia ajuda no País ne’ebé ke importante mós ba Timor, tanba sempre iha ba Timor kuandu presiza.

Nia dehan nu’udar enbaizadóra labele promete uluk lai maibé nia sei ba haré para esplora mak kooperasaun saida mak sei tuir mai maibé agora dadauk sira fó bolsu estudu ba timoroan sira nune’e mós sempre apoiu mai Timor-Leste (TL) iha saúde liu-liu defeza no polísia.*Jos