Governu Korea Haruka ona Kontratu Traballadór 500 Mai TL

Naunil Média (Díli), Diretór Jerál Sekretária Estadu Formasaun Profisionál no Empregu (SEFOPE sigla portugés), Paulo Alves, Hateten governu koreanu haruka ona kontratu serbisu traballadór timoroan hamutuk 500, ne’ebé sei serbisu iha área peska no fábrika.

“Foin daudaun sira haruka ona kontratu ema na’in-500 atu bá servisu iha Korea do Súl”, Dehan Diretór SEFOPE Paulo Alves ba jornalista sira iha salaun CNE Kolmera, kinta (15/07).

Nia hatutan, Korea rasik agora ne’e iha ona variante Delta ne’ebé númeru infesaun sa’e maka’as, tanba ne’e sira suspende atividade hotu atu tama bá sira-nia rai, Dehan nia.

“Governu Koreanu suspende mós entrada nasaun neen ne’ebé atu haruka sira-nia traballadór”, katak nia.

Nia dehan, daudaun traballadór ne’ebé kontratu iha ona tuir hela formasaun prelemináriu, tanba ne’e hein variante foun Covid-19 ne’e menus maka bele haruka traballadór ba serbisu.

Aleinde ne’e, iha mós traballadór timoroan 100 ne’ebé tuir planu sei dezloka bá Korea Súl iha loron 02 jullu, maibé la konsege tanba nasaun ne’e impoin regra foun iha ámbitu pandemia, Nia haktuir

Hahú tinan 2009 to’o 2020, traballadór timoroan hamutuk 3.696 mak serbisu ona iha Korea do Sul iha área peska, fábrika no agrikultura. Ana