Espoza PR Louva Esforsu Prezidenti CNJTL ho Estrutura

Naunil Média (Díli), Espoza Prezidenti Repúblika Cidália Lopes Nobre Mouzinho Guterres , Louva vontade no esforsu husi Prezidenti CNJTL ho nia estrutura tomak

Espoza Prezidenti Repúblika ható kestaun ne’e liu husi diskursu bainhira partisipa Kongresu Consellu Nasional Juventude Timor-Leste (CNJTL), ne’ebé hala’o iha Salaun katedral, tersa (20/07).

“Ha’u louva vontade no esforsu husi Prezidenti CNJTL ho nian Estrutura tomak, hodi bele realiza konferensia ida ohin, nune bele aprezenta matéria importante, atu hametin no haforsa ezistensia no vida organizasaun CNJTL nian ohin no ba futuru”, Dehan espoza PR.

Espoza PR hatutan,  joven sira tenke sai nu’udar ajenti ba mudansa iha sosiedade no nasaun, ema hotu hatene katak Juventude maka sai forsa moriis ba processu dezenvolvimentu tomak, nune’e juventude tenke sai duni sentru ba atensaun Polítika governu nian.

Cidalia hateten, Provas hatudu ona katak esperiensia pasadu Juventude hola responsablidade no hola parte ativu, iha prosesu tomak luta ba libertasaun nasionál, brani se hirus matan no simu sakrifisiu ba Timor-Leste UKUN RASIK AN. ne’e karakteristika juventude patriota.

Espoza mós fiar katak governu liu husi Sekretáriu Estadu Juventude no Disportu, no liña Ministeriu relevante sira, sei fó atensaun nafatin ba asuntu juventude sira, Esperansa nia.

Nia espera katak  konferensia  ohin loron ne’e, nu’udar mekanismu ida, atu  CNJTL nudar organizasaun foin sae sira nian, konsulta no  reve fila fali  planu no programa  ne’ebé iha tiha ona , atu buka koordena ho institusaun relevante, oinsá mak bele hakbit liu tan, kapasidade foinsae sira nian, hodi fasilita no perpara joven sira sai modelu di’ak no quadros kompetentes ba Timor-Leste (TL) nia futuru.

Iha fatin hanesan Pezidenti Consellu Nasionál Juventude Timor-Leste (CNJTL) Maria Dadi Magno, Hateten hala’o kongresu tanba atu elabora estatutu no kongresu nasionál mak desizaun aas liu iha organizasaun ida nia laran.

“Kompetensia ba konsellu Ezekutivu ne’ebé mak ne’ebé reprezenta husi konsellu fundadór, atu harmoniza no elabora estatutu ne’ebé mak debate iha kongresu, hanesan ita hatene kongresu nasionál mak desizaun aas liu iha organizasaun nia laran, entaun husi mandatu ida ne’e presiza halo elaborasaun ba estatutu no rezimentu internu”, Dehan Prezidenti CNJTL

Prezidenti CNJTL ne’e hatutan, realiza konferensia ne’e objetivu atu ofisializa no aprova estatutu no rezimentu Organizasaun CNJTL.

“Iha konferensia ne’e rasik ita hotu hatene katak nia tema ne’ebé ita foka kontinua hametin no haburas ezisténsia CNJTL, mai ho vizaun estadista hodi haburas prinsipiu estadu direitu demokrátiku, ha’u hanoin essensial tebe-tebes atu liga uituan ba kontestu real ita nia estadu Repúblika Demokrátika De Timor-Leste (RDTL)”,Tenik nia.

Nia esplika, iha kompozisaun estruturamente kuadru la mai husi nevel munisípiu postu, maibé reprezenta kuadru CNJTL Aileu tó RAEOA, reprezenta nia lideransa no vise na’in ida mak partisipa inklui mós  konsellu fundadores ne’ebé mak  16 Organizasaun masa Juventude rezisténsia kontinua iha ne’e.

Estatutu ne’ebé mak kofresista sira debate kongresu ne’e maka, iha priamblu no tó artigu 26, estatutu ne’ebé ko’alia natureza, prinsipiu, valores, vizaun, misaun, objetivu, klaramente pozisaun nivel desizaun konsellu fundadores, konsellu Ezekutivu konsellu munisípiu, konsellu postu inklui orgaun fiskal no orgaun juridiku ida ne’e kompozisaun husi estatutu, Nia hakotu. *Jos