Komisariu Faustino: Virus Delta, PNTL La Tolera Aktus Ilegal
Naunil Média (Díli), Komandante Jerál Polísia Nasionál Timor-Leste (PNTL) Komisariu Faustino da Costa, Hateten Virus Delta iha ona rai ketan, tanba ne’e Polísia sei latolera atividade ilegal sira iha fronteira no tenke hapara imediata.
Komisariu ható lia hirak ne’e ba jornalista sira hafoin enkontru semanal ho Prezidenti Repúblika Francisco Guterres “Lú Olo” iha Palásiu Prezidenti Nicolau Lobato Bairru Pite, kinta (22/07).
“Hanesan mós ita bo’ot sira akompaña iha Variante Delta ne’e iha rai ketan sorin ne’e iha ona, entaun se ita lakohi buat sira ne’e tó iha ita nia rai, buat sira ilegal tantu ema ka hola sasán sira ilegal ne’e, imediata ita tenke hapara tanba polísia sei latolera ida ne’e atu akontese”, dehan Komisariu Faustino da Costa
Komisariu hatutan, polísia koopera ho entidades sira liu-liu lideransa komunitaria sira, tantu mós parte hotu ne’ebé iha ne’ebá para hodi asegura fronteira.
Faustino hateten nafatin mak sidadaun balun tenta para atu halo nafatin atividade sira ultrapasa fronteira ilegal ne’e, mak komandu aprezenta hela ba PR no polísia mós halo ona kapturasaun ba sira ne’ebé koko atu sai, balun ne’ebé sai ona iha deportasaun hanesan ema hotu akompaña.
Nia esplika klaru ke polísia kaptura ne’e primeiru tenke kumpri lai regras Estadu emerjensia nian submete ba karantina kuandu sai ona sira livre husi karantina mak kontinua prosesu Investigasaun
Nia dehan, durante ne’e Polísia Nasionál Timor-Leste (PNTL) halo kapturasaun ba ema sira ne’ebé tenta atu ultrapasa fronteira ilegal hamutuk nain sia (9) no deporta ne’ebé iha hamutuk (14) pesoas ne’e durante semana rua nia laran.
Iha enkontru semanal ne’e Pezidenti Repúblika (PR) Francisco Guterres “Lú Olo” mós husu ba Polísia Nasionál Timor-Leste (PNTL) servisu kontinua la’o nafatin knaar no responsabilidade ne’ebé komandu nian, no komandu presiza nafatin halo ida ne’e, Nia hakotu. * Jos
