PR Atribui Sertifikadu Rekoñesimentu Ba Manán Na’in FNAK

Naunil Média (Díli), Prezidenti Repúblika (PR), Francisco Guterres “Lú Olo”,  Atribui sertifikadu ba manán ba sira kompetisaun Festival Nasionál Arte no kultura (FNAK).

Xefí kaza sivil Francisco Maria de Vasconcelhos ható lia hirak ne’e liu husi diskursu bainhira atribui sertifikadu rekoñesementu ba manán na’in sira iha Palásiu Nobre Lahane,  Sexta (23/07).

“Agora moras komesa redúz ona entaun Prezidenti Repúblika (PR) hateten di’ak liu halo avaliasaun ida,  tanba iha tempu besik mós iha fali tan festivál, tanba ne’e Prezidenti Repúblika hakarak fó rekonesimentu ba komisaun organizadora no ohin dader halo avaliasaun no lorokraik ne’e atribui rekonesimentu hosi Prezidenti Repúblika”, dehan Xefí Caza civil

Xefí  Caza Civil hatutan,  serimónia ne’ebé  ohin halo ne’e ba atividade festivál kulturál, ne’ebé mak tuir loloos ne’e halo iha tinan kotuk depois fulan outubru festivál ne’e halo, maibé iha momentu ne’ebá iha pandemia Covid-19 ne’e  maka’as tebes,  entaun hadia tó mai inísiu tinan ne’e Covid-19 sa’e maka’as, no ohin loron ne’e, dader halo avaliasaun no loro kraik atribuisaun rekonesimentu hosi Prezidenti Repúblika (PR) ba sira ne’ebé fó kontribuisaun ba dezenvolvimentu ba arte no kultura.

Iha biban ne’e Xefí  Caza Civíl mós apela ba manan na’in sira atu labele para de’it iha ne’e, maibé kontinua mantein hodi kompete bainhira iha tan festivál ruma. Maibé ida ne’e depende ema ida-idak nia esforsu tanba hanoin katak inísiu halo ida ne’e no futuru sei iha fini ne’ebé di’ak liu mosu barak liután.

“Ita fiar katak jerasaun foun mai, sira sei hutudu prestasaun no lian ne’ebé di’ak bele hametin no haburas liután arte no kultura”, tenik xefí kaza sivil

Iha fatin hanesan Sekretariu Estadu Arte no Kultura (SEAK), Teofilo Caldas mós husu manan nain sira kontinua ho talentu ne’ebé mak iha nune’e karik iha tinan oin mak iha kompetisaun tenke partisipa nafatin.

“Nune’e mós ba Juri ne’ebé mak ohin ita dignifika sira ho sertifikadu ne’e husu ita boot sira nia servisu ho honestidade, ita hakarak neutralidade atu fo falor ba ita nia Artista sira, iha Altura ne’ebá ba ha’u lembra ami tuur iha ne’ebá kontente loos, ita juri sira katuas ona mais sira matan mós hela haree ita boot sira nia aprezentasaun ne’e diak ita louva sira nia espesialista ne’ebé mak sira fo valor ne’e”.katak SEAK.

Teofilo hatutan iha kompetisaun tinan kotuk nia mós tuur besik ho Ministeriu Turismo, no Ministeriu Ensinu Superior maibé sira mós la intende oinsá atu fo valor ba artista ida no oinsá fo valor ba grupu kultural ida, tanba ne’e lá’os sira nia profisaun

“Ita apresia ho kapasidade juri sira nia sira konsege detekta se mak atu manan nain no semak bele sai premeiru lugar no segundu lugar” katak nia.

Nia mós Husu ba Xefí Kaza Sivil katak mesmu iha pandemia Covid maibé ho Vasinasaun ne’ebé mak iha ona espera katak tinan oin bele realiza tan.

Nune’e mós Manan Nain  Kanta múzika rezistensia Miucha Borja da Costa hatutan nia sente orgullu no kontente tebes tanba bele simu sertifikadu husi Prezidensial Republika (PR) tanba ne’e hanesan memoria ida ne’ebé mak diak tebes nu’udar sidadaun ida no mós nu’udar kantora ida.

“Liu Husi sertifikadu ne’ebé mak ha’u simu ha’u sente kontente tanba estadu ka Prezidensial Repúblika fo ondra ba susesu tomak ne’ebé mak ha’u hetan iha loron kompetisaun nia, no mós fo ondra ba ha’u nia esforsu iha kompetisaun ne’ebé mak halao ona iha tinan kotuk” katak nia.

Serimonia atribuisaun sertifikadu ba manán nain sira ne’e entrega husi Xefí Kaza Sivil Francisco Maria De Vasconcelhos no distribui mós ba komisaun Organizadora Juri no Grupu Dansa tradisional husi Munisipiu no manan nain Muzika Rezistensia iha Programa Festival arte no Kultura Prezidensia Republika.*Jos