Lere Apela ba Joven, Artemasiais Labele Koko Estadu
Naunil Media (Díli), Xefí Estadu Maior General das Falintil Forsa Defeza Timor-Leste (F-FDTL) Tenente General Lere Anan Timur, Apela ba joven artemasiais Maliana labele koko estadu nia forsa.
Tenente General ható kestaun ne’e ba jornalista sira hafoin remata enkontru ho Prezidenti Repúblika (PR) Francisco Guterres “Lú Olo” iha palásiu Prezidenti Nicolau Lobato Bairru Pite, kuarta (28/07).
“Ha’u so apela de’it ba joven sira husi Maliana, artemasiais ha’u dehan tempu oho malu sunu malu ne’e liu tiha ona, mas imi hakarak koko estadu nia forsa, estadu sei atua ita nu’udar timoroan joven sira ha’u konsidera hanesan ha’u nia oan hadomi ho nia futuru no hadomi o nia nasaun nia future, ho nia povu nia futuru ida ne’e mak importante liu”, dehan Tenente General Lere Anan Timur.
Tenente General hatutan uluk sira oho malu joven ida mate, depois ikus mai sei sunu uma ameasa malu polísia no forsa defeza interven mós sira provoka nafatin.
“Entaun ita presiza estabilidade se bainhira ita ko’alia kona-ba dezenvolvimentu, ita ko’alia mós kona-bá estabilidade ne’e mak situasaun ita nian”, Katak nia
Antes ne’e grupu deskoñesidu sunu uma rua bainhira uma na’in laiha fatin, kazu ne’e akontese iha munisípiu Bobonaro, postu administrativu Maliana, suku Ritabou, aldeia Samelau iha loron Sabadu (24/07/2021) mais ou menus tuku 13:50.
Depois de akontesementu Polísia Nasionál Timor-Leste (PNTL) munisípiu Bobonaro tó kedas iha fatin akontesementu , hodi komunika kedas ba iha parte Bombeirus atu halo intervensaun, maibé konsege salva de’it uma ida enkuantu uma ida seluk ahi han motuk.
Iha biban ne’e Prezidenti Repúblika Francisco (PR) Guterres “Lú Olo” mós husu ba Tenente General katak tenke tau matan didi’ak ba forsa sira, liu-liu kona-bá seguransa kona-bá disiplina kona-bá hirarkia buat sira ne’e tenke metin nafatin iha instituisaun ida nia laran, so kuandu ida ne’e iha mak instituisaun ida la’o seguru.*Jos
