Professor Rihun 1249 iha Díli Seidauk Vasina
Naunil Media (Díli), Diretór Edukasaun Munisípiu Díli Duarte Braganza, Hateten Professor iha kapital Díli hamutuk rihun 1249, kompostu husi ensinu pre-eskolar tó ensinu sekundária Jerál (ESG) inklui Ensinu Tekníku Vokasional (ESTV) tó ohin loron seidauk simu vasina.
“Total Professor iha Díli hamutuk 3153 kompostu husi ensinu pre-eskolar tó ensinu sekundária jerál no inklui tekniku vokasional, husi númeru ne’e, professor hamutuk 1904 (60,38%) mak simu ona vasina no 1 249 (39,62%) mak seidauk simu vasina”, Dehan Diretór Edukasaun Munisípiu Díli Duarte Braganza ba jornalista sira iha edukasaun munisípiu Díli, Comoro, segunda (02/08).
Nia hatutan, iha loron 19 fulan jullu tinan 2021, tanba ita hare’e ona 50% professor mak simu ona vasina,ho ida ne’e tó agora ita nia professor hamutuk 1249 mak seidauk simu vasina no 1904 mak simu ona.
Nia dehan, ho ida ne’e bazeia ba ejizensia husi Ministériu Saúde nian, katak Ministériu Edukasaun Juventude no Desportu (MEJD) hodi apela ba professor no estudante sira tenke simu vasina.
“Tanba ne’e agora dau-daun sira apela ba professor sira ne’ebé mak seidauk simu vasina ne’e labele fó hanorin ba estudante sira”, Katak nia.
Nia informa, ho ida ne’e professor sira ne’e tenke submete ba governu tanba la kumpre ona regras Ministériu Saúde nian.
“Wainhira la simu vasina sei la hanorin estudante sira, no sei tau falta”, nia preokupa.
Iha fatin hanesan, Diretór ESG 5 de Maiu Manuel Verdial, hateten eskola refere atu realiza ona sira nia prossesu aprendijazem.
Nia dehan, sira husu ba MS atu nune’e bele hola medida hodi halo vasina ba estudante sira, atu nune’e labele fó impaktu ba sira nia prossesu aprendijazem.
“Ami nia professor hamutuk 30 mak simu ona vasina no hela 18 inklui dadus ba estudante sira ne’ebé mak vasina tó agora seidauk hetan vasina”,Katak nia.
Tanba ne’e,ami husu ba ita nia MS hodi bele hola medida atu nune’e bele halo vasina iha ami nia estudante sira iha eskola refere, antes ita nia prossesu aprendijazem la’o hodi labele fó impaktu ba ita nia professor no estudante sira, Dehan nia.
Total estudante iha ESG 5 de maiu ba tinan ida ne’e hamutuk 1136 husi númeru ida ne’e tó agora estudante barak mak seidauk simu vasina, tanba ne’e eskoala refere husu ba MS atu nune’e bele fasilita vasina ba estudante sira iha eskola refere.
Nia relata total professor iha eskola refere hamutuk 48 husi númeru ne’e professor hamutuk 18 mak tó agora seidauk simu vasina inklui estudante hamutuk 1136. Ana
