Ramos Horta: Ezistensia AJFTL Promove Jornalista Feto TL

Naunil Media (Díli, Eis Prezidenti Repúblika José Manuel Ramos Horta apoiu jornalista feto sira ne’ebé mak agora dadaun iha inisiativa harí Asosiasaun Jornalista Feto Timor-Leste (AJFTL), ne’e di’ak oinsá promove jornalista feto sira.

Eis Xefí estadu José Manuel Ramos Horta ható lia hirak ne’e ba jornalista sira bainhira remata enkontru ho Board no Fundador (AJFTL) sira iha Knaar Fatin Farol, segunda, (02/08).

“Uluk nanain parabéns ba imi nia inisiativa ida ne’e, hanesan inisiativa barak iha Timor-Leste no iha mundu, inisiativa ne’ebé buka apoiu no tane ba iguldade jeneru, fó igualdade oinsá para haree loke odamatan hodi fó oportunidade ba feto sira iha instituisaun oin-oin instituisaun públiku, ofisiál, instituisaun akademíka públiku no  privadu, para iha tempu badak meius bele hetan variedade entre feto no mane, direitu igual oportunidade hanesan i ezerse funsaun hanesan”, Dehan Premiadu Novel da Paz Ramos Horta.

Eis Prezidenti Repúblika ne’e hatutan, kazu partikularmente asosiasaun Jornalista Feto Timor-Leste tuir politíka no estratezia (AJFTL) rai barak iha mundu inklui mós Timor-Leste (TL).

“Ho imi nia asosiasaun haree oinsá promove liu tan oportunidade ba feto jornalista, oportunidade liu husi formasaun no apoiu solidaridade entre feto sira i jornalista mane sira, ema seluk mós buka apoiu tantu inisiativa pozitivu, ha’u nu’udar timoroan ida lider ka la lider ita apoia, ita hotu buka apoiu labarik feto kiik sira iha oportunidade ba eskola, dala ruma iha uma família oan barak osan laiha, entaun sira halo diskriminasaun negativu fó prioridade ba mane no oan feto hela iha uma, haree kosok oan sira no ajuda inan sira iha uma ne’e ladiak”, Sujere Horta.

Eis diplomata ne’e hateten,  ho inisiativa (AJFTL) bele iha rejultadu konkretu no di’ak, premeiru iha klase jornalista sira, kria oportunidade liu tan, no la’ós de’it jornalista ezerse profisaun, maibé mós iha área jestaun manajementu iha media privadu no nasionál sira.

Board AJFTL ne’e dehan la’ós deit halo formasaun ba jornalista iha setor media,  maibé haree mós oinsá bele tama iha parte ida importante tebes media manajemen, ida ne’e mak halo desizaun politíka formasaun feto nia iha instituisaun média nia laran, Dehan Ramos.

Iha fatin hanesan Board Asosiasaun Jornalista Feto Timor-Leste (AJFTL) Suzana Cardoso hatutan asosiasaun ida ne’e importante tebes.

“Asosiasaun Jornalista Feto Timor-Leste ne’e importante tebes, uluk ha’u ho Cendi Siquera ami mós iha planu ona, maibé ikus mai ita bo’ot sira kontinua ba oin, ida ne’e idea di’ak, importante liu tanba iha jornál sira,  Timor seidauk tau atensaun ba senseblizasaun ba Jeneru”,  Katak nia.

Board AJFTL ne’e hateten, feto ne’ebé mak aileba sira mós seidauk tau importansia, no la’ós ne’e de’it maibé iha mós feto ne’ebé mak serbisu imfrastruktura no seluk tan.

“Tanba ne’e mak ita nu’udar feto, ita harí asosiasaun ida ne’e, ita haree liu ba maluk feto nia partisipasaun no sira nia kontribuisaun, no ohin ita mai hasoru ona ema importante sira entaun ita mós tenke iha seriu no tau konsiderasaun para nune’e bele lao ba oin no lao efetivu liu tan”, Dehan nia 

Nia hateten, signifika katak tenke fokus oinsá lao ba oin, no labele dada tempu tanba ne’e nia mós husu inisiadór sira, atu kontinua esforsu a’an ho fokus nune’e mehi ne’ebé mak iha bele susesu.

“Tenke iha ona planu bainhira mak halo kongresu no eleisaun ba Prezidente AJFTL no ita bo’ot sira mós tenke hanoin oinsá kontribuisaun bele lao maske idak-idak mai husi media rasik, maibé tulun malu oinsá halo kobertura ba iha Eleisaun Prezidensial saida mak sai hanesan partisipasaun feto iha Prezidente Liu husi kampanha too eleisaun”,  Katak nia.

Asosiasaun Jornalista Feto Timor-Leste (AJFTL) harii ou inisia husi Jornalista Feto sira ne’ebé mak mai husi média ne’ebé mak diferente, no ohin Fundador ho Board sira halo ona diskusaun ba Statutu bainhira remata mak iha tempu badak Assosiasaun ne’e sei ba halo rejistu iha Ministériu Justisa (MJ).*Jos