VPM Armanda: Husu Povu TL Labele Fiar informasaun Falsu Kona-bá Vasina
Naunil Media (Díli), Vise-Primeira Ministra (VPM) no Ministra Solidariedade social no inklusaun (MSSI) Armanda Berta dos santos, Husu ba ba povu Timor-Leste labele fiar informasaun falsu kona-bá vasina kontra Covid-19.
“Husu ba komunidades sira atu la bele fiar imformasaun falsu ne’ebé lansa husi ema individual sira iha media sosial hodi hatauk komunidade sira vasina simu vasina”, Dehan VPM Armanda Berta dos Santos ba jornalista sira hafoin partilla informasaun kona-bá vasina ba komunidade sira iha aldeia Malboro Suku Ailok, postu administrativu Kristu Rei, munisípiu Díli, segunda (02/08).
Nia hatutan, ha’u fiar katak ha’u nia inan aman sira balun dala ruma rona rumoris sira ne’ebé espalla, entaun ho ida ne’e ita bo’ot sira tauk ho situasaun ne’e tanba menus imformasaun no konesementu.
“Ha’u husu ba ita bo’ot sira labele tauk ka fiar imformasaun falsu (HOAX) sira ne’e, maibe ha’u husu ita tenke simu vasina ne’e hodi bele prevene ba ita nia saúde”, dehan Armanda.
Governante ne’e mós nafatin Enkoraja ba komunidade hotu hotu atu hakbesik a’an ba sentru vasinasaun nune’e ema hotu bele simu vasina.
Nia akresenta, atividade hotu iha rai laran atu hahu fila fali hanesan baibain, tanba ne’e mak husu komunidade sira atu kontribui ba vasina kontra covid-19.
Tuir dadus ne’ebe Naunil Media asesu porsesu vasinasaun ba populasaun Timor-Leste husi tinan 18 ba leten ne’ebé simu ona vasina doze dahuluk hamutuk ema 288.483 ka atinji ona 32.8%.
Iha munisipiu Díli ema 137.585 ka 64.4% mak simu ona vasina doze dahuluk.
Enkuantu ema ne’ebé simu ona vasina doze daruak tuir dadus nasionál hamutuk ema 98.322 ka atinji 13.03% , no munisípiu Díli hamutuk 84.667 ka atinji 39.60%. Ana
