Alcino Barris, Eleisaun PR Sei Realiza iha Fulan Marsu 2022
Naunil Media (Díli), Prezidenti Comissão Nacional Elisoens (CNE) Alcino Barris, Informa preparasaun ba eleisaun prezidensiál (EP) ne’ebé sei akontese iha fulan Março 2022 la’o di’ak tebes tuir KRDTL.
Lia hirak ne’e ható husi Prezidenti CNE ba jornalista sira hafoin hasoru malu ho Prezidenti Repúblika (PR) Francisco Guterres “Lú Olo” iha palásiu Prezidenti Nicolau Lobato Bairru Pite, Tersa, (03/08).
“Preparasaun di’ak tebe-tebes tanba ne’e eleisaun sei akontese duni iha fulan Marsu tuir Konstitusaun Repúblika Demokrátika Timor-Leste (KRDTL) preve purtantu buat hotu-hotu la’o di’ak hela”, Dehan prezidenti CNE Alcino Barris
Kona-bá agora dadaun situasaun pandemia Covid-19 ne’ebé Variante foun ho naran Delta ne’ebé mak sai preokupasaun bo’ot iha mundu inklui Timor-Leste Alcino Barris hatan situasaun agora sei normal, Dehan nia.
“Situasaun agora sei normál hela la’o hela purtantu kampaña mós seidauk too iha ne’ebá nafatin la’o mantein se iha mudansa ita halo reazustamentu”, Tenik nia
Nune’e mós kona-bá oinsá CNE nia preparasaun ba Timor oan sira ne’ebé hela iha diaspora tuir prezidenti CNE ne’e hateten, prosesu la’o hela no sira mós konvida ona MNEK parte Asuntus konsulares no esplika kona-bá oinsá resensiamentu no votasaun, Dehan nia.
“Ha’u hanoin prosesu la’o hela cne Konvida ona autoridade Ministeriu Negósiu Estranjeiru Kooperasaun (MNEK), husi parte dirizentes Asuntus konsulares ba esplika ona kona-bá oinsá ita atu tama iha ema nia rain, para atu halo aktualizasaun baze de dadus no resensiamentu eleitoral ba eleitor sira atu vota”, Tenik Alcino Barris
Nia hatutan, tanba iha país ida ba país seluk nia regra lahanesan agora dadauk hatene katak pandemia ne’e fatin balun sei aplika hela buat ida konfinamentu ne’e, serka sanitaria ne’ebé tama iha ne’ebá mós tenke obedese lai kuarentena i depois kuarentena mak foin bele halao servisu.
Nia hateten, pur-ekuantu sei hela resposta husi Ministeriu Negósiu Estranjeiru Kooperasaun (MNEK) fatin ne’ebé mak parte CNE atu ba mak hanesan Austrália, Korea do Súl, Inglatera, Irlandia do Norte no Portugál, fatin sira ne’e mak tenke ba tantu sira sei hein hela, enkontru ona MNEK sei fahe informasaun kona-bá ida ne’e. *Jos
