PM Taur: Husu Populasaun Ermera Tenke Vasina
Naunil Media (Díli), Primeiru Ministru (PM) Taur Matan Ruak, Husu ba populasaun sira iha munisípiu Ermera, liu-liu inan aman sira tenke partisipa iha kampaña vasinasaun, tanba Ermera mak vasina kiik liu.
Xefí guvernu ható lia hirak ne’e ba jornalista sira hafoin enkontru semanal ho Prezidenti Repúblika (PR) Francisco Guterres “Lú Olo” iha palásiu Prezidenti Nicolau Lobato Bairru Pite, kinta (05/08).
“Saida mak governu husu, ha’u pesoalmente husu ba ita nia inan aman sira tenke partisipa iha kampaña vasinasaun, tanba Ermera ne’e ikus liu munisípiu ne’ebé mak hetan vasina kiik liu mak Ermera nian 12% de’it”, Dehan Xefí governu da ualu konstituisional Taur Matan Ruak.
Primeiru Ministru fó zemplu hanesan Viqueque ne’e segundu lugar tuir Díli, entaun nia enkoraja populasaun sira dalan di’ak atu konbate moras Covid-19 ne’e mak simu Vasina.
“Ita sei iha vasina sufisiente fó ba ita nia sidadaun sira, tanba ne’e mak ha’u enkoraja sira vasina, se ita bo’ot sira haree medidas ne’ebé governu hasai ema ne’ebé simu ona vasina dala rua nia lao livre”, Tenik Nia.
PM dehan, pior liu tan variante Delta ne’e governu preokupa loos, tanba iha tiha ona iha vizinu Indonézia, no Timor-Leste mós iha ona entaun preokupa loos, tanba ne’e mak nia kontinua enkoraja sidadaun sira para simu vasina ne’e importante.
Nia haktuir, Serka Sanitária (SS) ba Ermera ne’e dalan ida mak evita atu moras ne’e labele da’et ba munisípiu seluk, maibé governu mós hatene katak povu Ermera ne’e depende liu ba kafé.Tanba ne’e governu mós tau matan ba ida ne’e.
Antes ne’e Konsellu Ministrus (KM) mós aprova ona projetu Rezolusaun Governu nian, ne’ebé impoin konfinamentu domisiliáriu jerál ba populasaun iha Postu Administrativu Ermera, no Postu Administrativu Railaku, iha munisípiu Ermera, hahú husi tuku 00:00 loron 31 fulan-Jullu tó tuku 23:59 iha loron 11 fulan-Agostu tinan 2021.
Tanba haree ba evolusaun husi situasaun epidémika iha Ermera, ne’ebé agrava liu ho númeru kazu diagnostikadu ho virus SARS-CoV ne’ebé sa’e maka’as iha munisípiu ne’e, no atu prevene risku ne’ebé mosu husi propagasaun COVID-19 nian. *Jos
