PR “Lú Olo” Lansa Livru Diskursu Volume I, 20 Maiu 2017 Tó 2019

Naunil Media (Díli),  Prezidenti Repúblika (PR) Francisco Guterres “Lú Olo” halo lansanmentu ba livru Diskursus Volume I ne’ebé foti iha 20 de Maiu 2017 tó 2019 nu’udar xefí estadu

Xefí estadu liu husi diskursus no mensájens ne’ebé halao iha palásiu Prezidente Nicolau Lobato Bairru Pite, Sexta (06/08),  ne’e hateten durante mandatu tinan rua tama iha livru ne’e reflekte nia kompromisu sanulu resin hitu, ne’ebé foti, iha 20 maiu 2017, nu’udar Prezidenti Repúblika.

Kompromisu sira ne’e hotu reagrupa no inkorpora iha área atuasaun oioin, iha ámbitu kompeténsias konstitusionais no haktuir dezeju atu tuba metin nu’udar “Prezidente ema hotu nian no ba ema hotu” ho atensaun espesiál ba:

“Afirmasaun no reprezentasaun Estadu, Koezaun no integridade Estadu, Koezaun no unidade nasionál, defeza no seguransa, paz, estabilidade, polítika no dezenvolvimentu, kooperasaun ho governu kona-bá polítikas, programas no objetivus dezenvolvimentu Sustentável, kombate korrupsaun no diskriminasaun ba ema, kombate violénsia hasoru feto no labarik, no protesaun meiu ambiente ba saúde públika no dezenvolvimentu sustentável”, Katak  nia

Xefí estadu mós hatutan, livru ne’e bale haree katak legalidade nu’udar prezidente Repúblika no kumpri de’it regra konstituisaun no lei sira.

“Iha livru ne’e mós bele haree katak ha’u “serve ho lealdade ha’u nia knaar ne’ebé hau simu, kumpre no haruka kumpre konstituisaun no lei sira no dedika ha’u-nia enerjia no kapasidade ba defende no hametin independénsia no unidade nasional”, Katak Xefí estadu.

Aman ba nasaun ne’e mós apela ba Ministériu Edukasaun no Ministeriu Ensinu Superior, atu uza livru ne’e hodi debate iha nivel hotu-hotu para bele hatene knaar Presidente Repúblika ida nian.

“Ha’u hakarak halo apelu espesiál ba Ministériu Edukasaun, Juventude no Desportu, Ministériu Ensinu Superior no Kultura,  no parseirus Governu nian ba edukasaun no formasaun sívika atu uza livru ne’e iha debate sira, iha nível ensinu hothotu, atu hothotu hatene knaar importante Prezidente Repúblika ida nian, liuliu, iha koezaun Estadu no Povu Timor-Leste  nian”, Tenik nia

Ba ida ne’e, PR mós konta ho kolaborasaun especiál Igreja Katólika nian, parseira boot liu Governu nian, iha área edukasaun no formasaun sidadaun responsável sira, ho rede boot eskola namkari iha País tomak.

No konta mós ho kolaborasaun husi entidade públika no privada sira, partidus polítikus, konfisaun relijioza sira seluk no mós husi organizasaun sosiedade sivíl sira, Dehan nia.

Nune’e, livru ida ne’e  sei halo parte memória institusionál. Tenke halo mós parte memória ne’e, livru diskursus husi PR nia antesesor sira, Prezidente Repúblika sira molok nia, no mós  husi titular órgaun soberania sira seluk nian. Xefi estadu dezeja tebes katak livru sira la’ós atu rai de’it iha uma  ka  iha biblioteka, maibé atu estuda, Nia hakotu.  *Jos