PR Vizita IBTL, No Simu Karta Husi Reitor
Naunil Media (Manufahi), Prezidensiá Repúblika liu husi Xefí Caza Sivil Francisco Maria de Vasconcelos ho ekipa vizita Instituto Boaventura De Timor-Leste (IBTL) no iha vizita ne’e Reitor (IBTL) mós entrega karta ba Ekipa Prezidensiá Repúblika.
Xefí kaza sivil ható lia hirak ne’e ba jornalista sira hafoin vizita Instituto Boaventura De Timor-Leste iha Manufahi, segunda, (16/08).
“Ohin iha Lokraik ida ne’e mai iha Manufahi ohin bá vizita fatin tolu fatin ida mak monumentu Dom Boaventura, ida grupu produtivu iha Betano ne’ebé produs hahán animal no agora mai iha Institutu Dom Boaventura”.dehan Xefí Caza Sivil Francisco Maria de Vasconcelos
Xefí kaza sivil hatutan, iha universidade hateten katak atu prepara rekursu umanu, tanba ne’e mak rekursu umanu presiza prepara maibé prepara la’ós de’it ninia siénsia ninia kakutak de’it, maibé ninia skill mós presiza hasa’e nune’e bele ba organiza ninia maluk joven sira iha aldeia iha suku.
Nia hateten, Kooperasaun entre munisípiu no Instituto superior sira ne’e hola papél ida oinsá tulun malu atu haree ba dezenvolvimentu munisípiu sira iha futuru.
“Ha’u hanoin Koperasaun entre munisípiu ha’u institutu superior sira, ne’e bele hola papel ida bele halo nusa mak tulun ba iha ita nia munisípiu autoridade sira iha ne’e para oinsá atu haree dezenvolvimentu Munisípiu ne’e di’ak liu tan ba futuru”, Katak nia
Nia informa, Ohin sira entrega ona karta ba Prezidenti Repúblika mas normalmente Prezidensiá Repúblika la halo servisu ne’ebé guvernu nian para evita duplikasaun, maibé Prezidenti Repúblika bainhira simu pedidu ruma surat ruma husi komunidade ou instituisaun sira, hanesan ne’e pedidu sira ne’e enkamina ko’alia ho guvernu husu enkontru regular PR ho Primeiru Ministru
PR hatete oinsá mak atu trata atu atende pedidu ho nesesidade sira ne’e.
Iha fatin hanesan Reprezentante Instituto Boaventura De Timor-Leste (IBTL) António Nunes Magno sente orgullu tanba Prezidente Repúblika mak Primeiru konselleru iha Instituto refere.
“Ami orgullu boot ida ho sua exselensia nia vizita i hanesan primeiru konselleru, uluk sira rasik mak hamutuk hodi halo funu ba rai ida ne’e hodi liberta ami povu tomak, nune’e ohin mós ita bo’ot sira ninia konprimisiu ne’ebé iha hodi fo neon metin ba foin sa’e tomak iha Munisípiu ida ne’e ba Timor laran tomak”, Tenik António Nunes Magno
Nia hatutan, ható prevemente ba reprezentante ekipa Prezidensiá Repúblika sira katak sira presiza tebe-tebes guvernu nia tulun ba iha área formasaun sira iha kada fakuldade ninian oinsá hodi prepara rekursu umanu iha Munisípiu ida ne’e enjeral iha RDTL no liu-liu ba dezenvolvimentu kosta súl ninian ne’ebé mak agora dadauk sai programa estrateziku ba estadu no guvernu rasik.
“Eszistensia eskola Instituto Boaventura De Timor-Leste ne’e foin mak hamriik iha tinan haat ho balun atu kompleta ba tinan lima no iha Instituto Boaventura De Timor-Leste ne’e rasik Fakuldade hamutuk haat mak hanesan Fakuldade Agrikultura, Fakuldade Saúde, Fakuldade Tekniku, no Fakuldade Ekonomia”, Dehan nia.
Fakuldade haat refere iha fakuldade rua ne’ebé hetan ona lisensa profesional husi ministériu, maibé husi fakuldade rua seluk mak sei iha hela prosesu kontinuasaun hodi hein lisensa ne’ebé mai husi ensinu superior. *Jos
