Governu Enkoraja Sidadaun TL Tenke Vasina, Hodi Kombate Corona
Naunil Média (Díli), Governu liu husi Sekretáriu Estadu ba Komunikasaun Sosiál (SEKomS), Méricio Juvinal Dos Reis ‘Akara’, Informa Programa Vasinasaun Nasionál sai hanesan estratéjia ikus atu kombate Covid-19 nian. Tanba ne’e,Governu sei enkoraja sidadaun sira hotu atu simu vasina.
“Vasinasaun mak estratéjia ikus atu kombate Covid- 19 e ida ne’e ita-nia primeiru Ministru mós repete bei-beik ne’e, tanba ne’e governu sei nafatin enkoraja sidadun sira hotu-hotu atu simu vasinasaun”, Dehan SEKoms Méricio Juvinal dos Reis ‘Akara’ iha sala Plenária Parlamentu Nasionál, tersa (17/08).
Nia hatutan, Agora dadaun ne’e parseiru sira husi Japaun no Austrália kontinua fó apoiu vasina AstraZeneca, no UNICEF mós sei fasilita vasina tipu Pfizer atu bele atribui ba sidadaun ho tinan 12 oo’o 17.
“Governu iha planu atu normaliza situasaun, wainhira taxa vasinasaun atinje ona porsentu 70 iha fulan-setembru no outubru tinan 2021”, Katak nia.
Nia haktuir, Deklarasaun husi Governu no Ministra Saúde kona-bá movimentasaun livre husi sidadaun ne’ebé simu ona vasina dala rua ne’ebé bazeia ba desizau Konsellu Ministru hanesan desizaun ás liu hotu.
Ho ida ne’e, sidadaun ne’ebé simu vasina dala rua livre atu asesu ba fatin hotu sein halo Swab test ne’e.
maibé iha kazu espesífiku ne’ebé sai hanesan razaun ba Ministériu Saúde atu kontinua aplika swab test wainhira halo nesesáriu, Nia hakotu. Ana
