Komemora Loron Falintil Ba Dala 46 Lere Hakru’uk Ba Herois Ne’ebé Lakon Vida
Naunil media (Dili) ohin loron 20 fulan Agosto tinan 2021, komemora loron Falintil ba dala 46, Xefe Estadu Maior General Falintil Forsa Defesa Timor-leste (F-FDTL) Tenente General Lere Anan Timor, hato’o parabens ba sobreviventis ne’ebé sei moris no hakruk bo’ot ba sira ne’ebé mate ona.
“Ha’u nia parabens ba sira ne’ebé sei moris, tamba pasa ona tempu ne’ebé naruk la’o tuir dalan ne’ebé naruk inimigu mai halo krimi hasoru ami-nia maluk falintil sira. Nomós ba sira ne’ebé mate ona ita fó ita-nia honra gloria nu’udar heroi ba ita-nia Nasaun ida ne’ebé ohin loron hetan soberania,” dehan Xefe estadu maior general (F-FDTL) ba jornalista sira hafoin remata serimonia aniversariu Falintil nian iha Fatuhada.
Tenente esplika, Falintil balun ne’ebé maka seidauk reforma, iha tempu badak nia laran sei reforma hotu, ba sira ne’ebé reforma ona Governu sei nafatin tau-matan.
“Ba Falintil ne’ebé aktivu iha (F-FDTL) númeru ha’u ladun hatene, maibé reforma ne’e 15 ona, no sira balun ne’ebé seidauk reforma ne’e iha hela lubuk ida, tempu besik ona atu reforma hotu, ba maluk falintil ne’ebe reforma ona no balun seidauk reforma estadu nafatin tau-matan.
Falintil sei reforma no sei intrega fali ba jerasaun foun para kaer intituisaun ida ne’e. Agora atu kaer instituisaun ida ne’e ba jerasaun foun sira tenki iha menitalidade espiritu patriotismu Nasionalismu hodi serví,” tenik nia.
Lere akresenta, agradese ba Falintil balun ne’ebe sei moris bele konta história ba jerasaun foun sira atu bele hatene.
“Grasas Maromak nian, ami balun ne’ebé sei moris ne’e kuaje oitenta (80) ital iha independensia ida ne’e para bele konta historia loloos ba jerasaun foun sira. Se ami mate hotu karik ema mai bosok konta tun sae, maibe sorte ami Falintil balun moris hela, tamba ne’e maka estadu nafatin rekoñese Falintil nia luta sobrevivente hodi kria kondisaun di’ak no nafatin tau-matan ba sira,” haktuir nia.
Tenente General ne’e hatutan, hahú funu kuaze vinte mil (20.000) ou trinta mil (30.000) ital husi Falintil, maibé Falintil loloos ne’ebé sobrevive durante vinte quatru anus (24) la to’o sem 100, depois 82-83 kompleta efektivu Falintil sobrevivente ninian tun mai atus-ida (100) resin ou maksimal atus-rua (200). Nel/Emj7
