Konsellu Rua Rekomenda PR Ható Pedidu EE Ba PN
Naunil Media (Díli), Konsellu Estadu (KE) no Konsellu Superior Defeza Seguransa (KSDS) rekomenda ba Prezidenti Repúblika (PR) Francisco Guterres “Lú Olo” atu ható Pedidu Estadu Emerjénsia (EE) nian ba iha Parlamentu Nasionál (PN), atu halo estensaun estadu emerjensia ba dala 17.
Lia hirak ne’e ható husi Xefí Kaza Sivil Francisco Maria de Vasconcelos ba Jornalista sira bainhira remata enkontru iha palásiu Prezidente Nicolau Lobato Bairru Pite Segunda, (23/08).
“Enkontru ohin membru konsellu sira rekomenda ba Prezidente atu prezidente ható pedidu ba Parlamentu Nasionál, Parlamentu atu deside ou atu autoriza la autoriza ne’e depende ba Parlamentu Nasionál, ohin lokraik ida ne’e prepara dokumentus atu haruka ba Parlamentu Nasionál PN”, dehan xefí kaza sivil Francisco Maria de Vasconcelos.
Nia hatutan, Kona-bá medidas sira ne’e depois de Parlamentu Nasionál (PN) autoriza ona, prezidenti dekreta i depois governu sei halo fali dekretu ida atu halo implementasaun, oinsá mak medidas sira ne’ebé mak foti bazeia ba dezenvolvimentu ne’ebé mak iha rain laran ba Covid-19 ho Variante Delta ne’ebé mak tama ona iha Timor-Leste (TL).
“Governu halo pedidu mai Prezidenti i prezidenti tenki konsulta ho orgaun konsultivu rua ida mak Konsellu Superior Defeza Seguransa ida mak konsellu Estadu i sira hotu-hotu rekomenda prezidente ható ba Parlamentu Nasionál”, Katak nia.
Antes ne’e governu liu husi reuniaun Konsellu Ministru (KM) mós propoin ba Prezidenti Repúblika (PR), Francisco Guterres “Lú-Olo” atu halo renovasaun estadu emerjénsia ba loron 30 iha fulan Setembru nian, atu nune’e bele evita no neutraliza risku ou propagasaun Variante Delta iha Timor-Leste.
Iha reuniaun konsellu estadu no konsellu superior defeza Seguransa ne’e halao liu husi Zoom, tanba médiku sira mak rekomenda dalan di’ak liu i ne’e prátika normal, iha fatin hotu evita kontaminasau para labele prejudika liu tan lori perigu ba Prezidenti Repúblika, tanba ne’e mak reuniaun liu husi Zoom. *Jos
