Atende Tratamentu Saúde Di’ak Ba Deputadu, PN-MS Selebra Akordu
Naunil Média (Díli), Parlamentu Nasionál (PN) asina memorandu entendimentu ho Ministériu Saúde (MS) ho objetivu reforsa ko’operasaun iha área saúde entre instituisaun rua ne’e.
Serimónia asinatura, ne’e asina hosi Prezidente Parlamentu Nasionál, Deputadu Aniceto Longuinhos Guterres Lopes ho Ministra Saúde, Odete Maria Freitas Belo ho objetivu atu reforsa ko’operasaun entre MS no PN, nune’e bele fó tratamentu saúde ba membru deputadu sira no funsionáriu sira iha ógaun soberania ne’e.
“Ho nune’e mós akordu ne’e haforsa liután klínika PN atu bele fó tratamentu di’ak ba membru parlamentu sira no funsionáriu sira” Informa Prezidente Parlamentu Nasionál, Aniceto Guterres iha Sala Konferénsia PN, kinta, (26/08).
Durasaun hosi akordu ne’e sei hahú hosi loron (01/09/2021) to’o fulan (09/2023), atu bele iha alterasaun depende iha nesesidade.
Prezidente PN DeAniceto Longuinhos Guterres Lopes, espera akordu ne’e bele la’o ho di’ak iha implementasaun nune’e ko’ordenasaun serbisu la’o ho fásil.
“Akordu ne’e nu’udar inísiu di’ak ida hodi garante saúde ba deputadu sira no funsionáriu sira parlamentu nian hodi hametin liután ita-nia sistema saúde, la’ós moras ki’ik ka boot ba hotu li’ur, afinál iha rai-laran bele hela atende,” Esplika Aniceto
Iha fatin hanesan, Ministra Saúde, Odete Belo sente kontente tanba bele serbisu hamutuk ho órgaun soberania ne’e nune’e hametin liután sistema saúde.
Nia dehan, maske Parlamentu Nasionál mantein ho postu tratamentu ida maibé ho akordu ida-ne’e bele ha boot liután serbisu ne’ebé ministériu iha.
“Atualmente ita iha médiku no infermeiru ne’ebé mak iha, ami mós indika médiku espesialista atu bele tau-matan ba ita-nia Prezidente PN nian,” Nia akresenta.Ana
