LABEH Kontra Implementasaun Programa Sesta Bazíka Iha TL

Naunil Media (Díli), Diretor ezekutivu Lalenok ba ema hotu (LABEH) Christopher Henry Samson, Informa nia parte kontra totalmente kona-bá implementasaun programa sesta bazíka iha Timor-Leste.

“Sesta bazika ne’e programa governu nian, ne’ebé governu mak tenke sai nain ba programa sesta bazíka ne’e, tanba sesta bazíka laos haree ba uma kain, la haree ba ema riku no kiak, ne’ebé sesta bazíka haree ba ema inklui bebe ne’ebé foin moris”. Dehan Diretór Ezekutivu LABEH Christopher Henry Samson ba jornalista liu husi komunikadu imprensa iha salaun LABEH Comoro, kuarta (25/08).

Diretor haktuir, saida mak akontese ba iha implementasaun programa sesta bazíka, governu hanesan fase liman intrega tiha sesta bazíka ba kompañia sira, no kompañia sira mak bele halo buat hotu hotu, i kompañia sira mak fahe rasik ba populasaun, ne’ebé iha ema balun simu no balun la simu.

“Implementasaun ne’e sala mai hosi ne’ebé ami identifika sala ne’e mai hosi governu,  tanba bainhira governu halo kontratu ba emprezariu sira,  depois governu la tuir sira katak kompañia sira fahe duni ka lae.? governu tur hakmatek iha nia fatin, no aat liu tan iha tempu Estadu emerjénsia”,  Esplika nia.

Nia hatutan, iha tempu estadu emerjénsia halibur ema barak hodi fahe sesta bazíka, ne’e sala.! Fahe Sesta bazíka tenke ba kada ema iha ninia uma, maibé ohin loron ita rona reklamasaun ema na’in hat iha uma nain rua Mak simu, ne’e kontradis polítika sesta bazíka ne’e rasik.

“LABEH mós halo monitorizasaun to iha Fatin sasan ne’ebé mak oferese, ne’ebé hodi hateten katak responsabilidade governu iha implementasaun programa sesta bazka ne’e minimu tebtebes”, Tenik Nia.

Diretór akresenta, Ita iha situasaun ida ne’ebé difisil tanba sa mak governu intrega de’it ba emprezariu sira, governu la tau matan no governu la tuir sira hodi para hatene, i enkuandu naran mak sesta bazíka maibé nia diferente ho Osan 200 dolar ne’ebé governu fó.

Maibé sesta bazíka la persija iha reklamasaun karik governu implementa ho didi’ak, tanba ida ne’e LABEH bolu atensaun nafatin ba governu favor ida responsabiliza ba rekerente sira,  no ema sira ne’ebé reklama sira nia direitu ba sesta bazíka ne’ebé tó agora seidauk hetan, Nia sujere.

“Labele halo diskriminasaun ba povu ida ne’e, iha balun simu no balun la simu, tanba ida ne’e problema sesta bazíka seidauk rezolve tuir LABEH haree , tanba ema sira ne’ebé reklama sira nia direitu barak tebtebes, ne’ebé husu nafatin ba governu atu responsabiliza ba Sira ne’ebé seidauk hetan nia direitu”,  Nia hakotu.  LTS